Ҳиндистон полицияси 20 май куни мамлакатда бўлиб турган 4 нафар Шри-Ланка фуқаросини ИШИД билан алоқадорликда айблаб, ҳибсга олди. Бу ҳақда Ҳиндистон нашрларига таяниб, Reuters манбаси хабар берди.
Манбада келтирилишича, 4 нафар хорижлик ҳинд полицияси томонидан Аҳмадобод шаҳрида ушлаган. Гумондорларни ушлаш учун махсус аксилтеррор операция ўтказилган.
Расмийлар Шри-Ланка фуқаролари Аҳмадобод шаҳри аэропортида тўхтатилганини билдирган. Бу ҳақда Гужарот штати полиция бошқармаси раиси Викас Саҳай хабар берган.
“Дастлабки текширувлар шуни кўрсатадики, гумондорлар Покистонда истиқомат қилаётган Абу исмли ИШИД етакчиси билан алоқада бўлган. Қўшимча текширувлар орқали жиноий гуруҳ кўламини аниқлаш давом этмоқда”, — деган Викас Саҳай.
Ҳибсга олинганлар Муҳаммад Нусрат, Муҳаммад Нафран, Муҳаммад Фарис ва Муҳаммад Рашдин исмли шахслар бўлган. Уларнинг барчаси Шри-Ланканинг Коломбо шаҳридан келгани айтилган.
Полиция ҳибсга олинганларнинг шахсий буюмлари орасидан ИШИД байроғини топган. Уларга тегишли иккита мобил телефондан жангари гуруҳ билан алоқадорликни кўрсатувчи турли фотосуратлар ва видеолар ҳам топилган. Шунингдек, ўқотар қуроллар аниқлангани ҳам билдирилган.
Суд тўрт нафар гумонланувчига нисбатан жиноий иш қўзғатган. Ҳиндистон ҳукумати Шри-Ланка Ташқи ишлар вазирлигидан ҳодиса юзасидан изоҳ сўраган. Вазирлик ҳозирча муносабат билдирмаган.
Изоҳ (0)