“Қимматбаҳо тақинчоқлар ва кийим-кечаклардан ўзини чекларди” — Қозоғистон президенти онаси ва энг қийин дамлари ҳақида гапирди

Қозоғистон президенти Қосим-Жўмарт Тўқаев ота-онаси билан тушган болалигидаги суратини эълон қилди ва онаси ҳақида гапириб ўтди. Унинг ёзишича, бўлажак президент тўрт фарзандли оилада дунёга келган. Улар оддий ва камтарона ҳаёт кечирган. Бу ҳақида у ўзининг Instagram саҳифасида маълум қилди.

 

 

Тўқаевнинг ҳикоя қилишича, онаси доим уй ишлари билан шуғулланган. Оила боқувчиси фақат отаси бўлиб, у ойлик иш ҳақидан ташқари, баъзан мақола ва китоблари учун гонорар ҳам олиб турган.

“Ҳар қанча ёш ва гўзал аёл бўлганига қарамай, онам ўзини кўп нарсаларда чекларди, хусусан, қимматбаҳо тақинчоқлар ва кийим-кечаклардан воз кечган эди. Албатта, у ҳам нафис кийинишни, чиройли безаклар тақишни хоҳлаган бўлиши табиий, аммо бутун ҳаётини фарзандларига бағишлади ва қисқа умрининг сўнгигача оналик бурчини садоқат билан бажарди. Ҳатто қимматбаҳо буюмлар сотиб олиш имкони бўлса ҳам ўзига ёққан нарсаларни невараларига совға қиларди”, деб эслайди Қозоғистон раҳбари.

Президент болалигини хотирлар экан, ҳаётидаги энг оғир паллалардан бири — Совет Иттифоқининг парчаланиши даври эканини ва ўша вақтдаги онасининг мардонавор қўллаб-қувватловини ҳеч қачон унутмаслигини қўшимча қилган.

“Ўша вақтда мен Россия ташқи ишлар вазирлигида ишлашда давом этишми ёки ватанга қайтишми, деган муҳим қарорни қабул қилишим керак эди. Эслайман, онам шундай деган эди: “Агар отанг тирик бўлганида, у албатта сенга Қозоғистонга хизмат қилиш кераклигини айтган бўларди”. Бу сўзлар менга амрдек янграган эди”, дея ёзган у.

Шунингдек, Тўқаев онаси болалигида кўплаб ибратли ҳикоялар сўзлаб бергани ва кейинчалик бу ҳикоялар бўлажак президент дунёқарашини шаклланишида жиддий рол ўйнаганини сўзлаб берди.

“Мени ҳар доим онам қўллаб-қувватлаб турган. Болалигимдан у чуқур маъноли воқеаларни сўзлаб берар, фикрлари ва қарашлари билан баҳам кўрарди. У жуда яхши ҳикоячи эди, унинг ҳар бир сўзини диққат билан эшитганимни ҳис қилган бўлса керак. Онамнинг ҳикоялари дунёқарашимга жиддий таъсир кўрсатган”, дейди Тўқаев.

Шу билан бирга, президент онасидан атрофга жиддий қарашни, ўзини назорат қилишни, яхши нарсалардан сабоқ олиб, ҳаётга татбиқ қилишни ўрганганини айтган.

“Эрталабдан кун давомида нима қилишингни ўйлаб қўй. Инсон тартибли бўлиши керак, чалғиган одам муваффақиятсизликка учрайди, дерди ”, дея эслайди Қосим-Жўмарт Тўқаев.