Ўзбекистон Президенти Шавкат Мирзиёев 30 декабрь куни Тожикистон, Қозоғистон, Туркманистон, Қирғизистон ва Россия раҳбарлари билан телефон орқали мулоқот қилди. Бу ҳақда Президент матбуот хизмати хабар қилди.
Дастлаб Шавкат Мирзиёев Тожикистон президенти Имомали Раҳмон билан мулоқот қилди. Давлат раҳбарлари кириб келаётган Янги йил билан бир-бирларини самимий қутлаб, Ўзбекистон ва Тожикистон биродар халқларига тинчлик, фаровонлик ва равнақ тилади.
Суҳбатда икки томонлама алоқалар ва минтақавий аҳамиятга молик долзарб масалалар муҳокама қилинди, Ўзбекистон ва Тожикистон ўртасидаги дўстлик, яхши қўшничилик ва стратегик шериклик муносабатларини яна-да мустаҳкамлашнинг биринчи галдаги вазифалари белгиланди.
Барқарорлик ва хавфсизликни таъминлаш, замонавий хатар ва таҳдидларга қарши курашиш масалаларига алоҳида эътибор қаратилди.
Амалий ҳамкорликни чуқурлаштириш, жумладан, товар айирбошлашни кўпайтириш, қўшма кооперация лойиҳаларини илгари суриш, ҳудудлараро ва маданий-гуманитар алмашинувни кенгайтириш юзасидан келишувларга эришилди.
Давлат раҳбарлари бўлажак икки ва кўп томонлама тадбирлар режасини кўриб чиқдилар. Шавкат Мирзиёев Тожикистон президентига 2021 йилда Шанхай ҳамкорлик ташкилотига раисликда муваффақият тилади.
Шунингдек, Ўзбекистон Президенти Қозоғистон раҳбари Қосим-Жўмарт Тўқаев билан ҳам мулоқот қилди. Суҳбат аввалида Ўзбекистон ва Қозоғистон президентлари бир-бирларини ҳамда икки мамлакатнинг қардош халқларини кириб келаётган янги 2021 йил билан самимий табриклади, тинчлик, фаровонлик ва равнақ тилади.
Ўтаётган йилнинг барча хатар ва қийинчиликларига қарамай, Ўзбекистон ва Қозоғистон ўртасидаги кўп асрлик дўстлик ришталари, яхши қўшничилик ва стратегик шериклик муносабатларининг изчил ривожланиши таъминланганлиги алоҳида таъкидланди.
Давлат раҳбарлари икки томонлама ҳамкорликни, шу жумладан, савдо портфелини яна-да кенгайтириш, инвестиция лойиҳалари, саноат, қишлоқ хўжалиги, транспорт ва энергетика соҳаларида алоқаларни чуқурлаштириш лозимлигини қайд этди. Ҳудудлар ўртасидаги яқин ҳамкорликни давом эттириш, маданий-гуманитар алмашинувнинг кенг дастурини амалга оширишга катта эътибор қаратилди.
Президентлар, шунингдек, минтақавий ҳамкорлик истиқболлари юзасидан фикр алмашиб, бўлажак олий даражадаги тадбирлар режасини муҳокама қилди.
Ўзбекистон раҳбари Қозоғистон президентига 2021 йилда Евросиё иқтисодий иттифоқига муваффақиятли раислик қилишини тилади.
Шу билан бирга, Шавкат Мирзиёев Туркманистон президенти Гурбангули Бердимуҳамедов билан ҳам телефон орқали суҳбатлашди. Давлат раҳбарлари бир-бирларини дилдан қутлар экан, кириб келаётган Янги йил муносабати билан самимий табриклар алмашиб, мамлакатларнинг биродар халқларига тинчлик, фаровонлик, бахт-саодат, муваффақият ва равнақ тиладилар.
Коронавирус пандемияси келтириб чиқарган глобал инқироз оқибатларига қарамай, якунига етаётган йилда Ўзбекистон ва Туркманистон ўртасидаги кўп асрлик дўстлик ришталарига, яхши қўшничилик, ўзаро ҳурмат ва ишонч тамойилларига, ўхшаш тарих, маданий ва маънавий қадриятлар муштараклигига асосланган стратегик шериклик муносабатларини мустаҳкамлашда катта натижаларга эришилгани таъкидланди.
Давлат раҳбарлари 2021 йилда кўп қиррали ҳамкорликни кенгайтириш бўйича қўшма режаларни, шунингдек, икки томонлама алоқалар ва халқаро тузилмалар, аввало, Бирлашган Миллатлар Ташкилоти доирасидаги бўлажак тадбирлар режасини атрофлича кўриб чиқдилар.
Президентлар савдо, саноат, қишлоқ хўжалиги ва транспорт соҳаларидаги ҳамкорликни кенгайтиришга, келгуси йилда ишбилармонлик ва маданий тадбирларга бой дастурни амалга оширишга келишиб олдилар.
Янги йилда Марказий Осиё давлатлари раҳбарларининг навбатдаги Маслаҳат учрашувига тайёргарлик кўриш масалалари ҳам муҳокама қилинди.
Бундан ташқари Ўзбекистон Президенти Қирғизистон президенти вазифасини бажарувчи Талант Мамитов билан телефон орқали мулоқот қилди.
Суҳбат аввалида томонлар кириб келаётган Янги йил муносабати билан бир-бирларини самимий қутлаб, икки биродар халққа тинчлик, фаровонлик ва бардавом равнақ тиладилар.
Талант Мамитов Шавкат Мирзиёевга коронавирус пандемиясига қарши курашда кўрсатилган катта кўмак ва амалий ёрдам, шу жумладан, Қирғизистон ҳудудларида мобил тиббиёт марказларини қуриш лойиҳалари амалга оширилгани учун чуқур миннатдорлик билдирди.
Икки мамлакат ўртасидаги дўстлик, яхши қўшничилик ва кўп қиррали шериклик алоқаларини изчил мустаҳкамлашнинг долзарб масалалари ҳам муҳокама қилинди.
Ўзбекистон–Қирғизистон ҳамкорлиги кун тартибидаги муҳим масалаларни, энг аввало, саноат кооперацияси, савдо, иқтисодиёт ва минтақавий транспорт йўлакларини ривожлантириш чораларини илгари суриш муҳимлиги қайд этилди.
Мулоқот сўнгида Ўзбекистон Президенти 2021 йил бошида Қирғизистондаги муҳим ички сиёсий тадбирларни ўтказишда муваффақият тилади.
Шунингдек, Шавкат Мирзиёев ва Россия президенти Владимир Путин ўртасида ҳам телефон мулоқоти бўлиб ўтди. Икки мамлакат раҳбарлари бир-бирларини дилдан қутлаб, кириб келаётган янги 2021 йил муносабати билан самимий табриклар алмашдилар, дўст халқларга тинчлик, фаровонлик ва равнақ тилакларини изҳор этдилар.
Коронавируснинг глобал миқёсда тарқалиши билан боғлиқ мураккаб шароитда давлатларимиз пандемияга қарши курашиш, жаҳон иқтисодий ва эпидемиологик инқирози оқибатларини енгиб ўтишда бир-бирига ҳар томонлама ёрдамлашгани ва амалий кўмак кўрсатгани катта мамнуният билан қайд этилди. Бугунги кунда Ўзбекистонда Россия вакцинасини ишлаб чиқариш бўйича кооперация имкониятлари фаол ўрганилмоқда.
Юзага келган вазият ва қийинчиликларга қарамай, барча даражалардаги фаол алмашинувлар давом эттирилди. Икки томонлама савдо кўрсаткичлари сезиларли ўсишига эришилди, саноат кооперацияси бўйича қатор йирик лойиҳалар ва маданий-гуманитар ҳамкорлик дастурлари йўлга қўйилди.
Суҳбат чоғида президентлар мамлакатлар ўртасидаги дўстлик, стратегик шериклик ва иттифоқчилик муносабатларини мустаҳкамлашга бундан буён ҳам қатъий интилишлари ва бу борада биргаликдаги саъй-ҳаракатларни давом эттиришларини тасдиқладилар.
Келгуси йил режасига киритилган икки ва кўп томонлама тадбирларга пухта тайёргарлик кўришга келишиб олинди.
Ўзбекистон ва Россия раҳбарлари халқаро сиёсат ва минтақавий ҳамкорликнинг долзарб масалалари юзасидан ҳам фикр алмашдилар.
Шавкат Мирзиёев, шунингдек, Қозоғистоннинг биринчи президенти – элбоши Нурсултон Назарбоев билан ҳам телефон орқали мулоқот қилди.
Ўзбекистон Президенти ва Нурсултон Назарбоев кириб келаётган Янги йил муносабати билан самимий табриклар алмашиб, бир-бирларига ҳамда Ўзбекистон ва Қозоғистоннинг дўст халқларига фаровонлик ва равнақ тиладилар.
Глобал хатар ва таҳдидлар кучайиб бораётган, жаҳон иқтисодиётида мураккаб вазият юзага келган бир шароитда мамлакатларимиз ўртасидаги дўстлик, яхши қўшничилик ва стратегик шериклик муносабатлари барқарор ривожланишда давом этгани, сифат жиҳатидан янги мазмун билан бойигани катта мамнуният билан қайд этилди.
Пандемияга қарши курашишда ўзаро ёрдам кўрсатилди. Фаол икки томонлама мулоқотлар, иқтисодиётнинг турли тармоқларида қўшма кооперация лойиҳалари давом этди, ҳудудлараро ва маданий-гуманитар алмашинувлар кенгайди.
Халқаро аҳамиятга молик долзарб масалалар ҳам кўриб чиқилди. Келгуси йилда Марказий Осиё давлатлари раҳбарларининг навбатдаги Маслаҳат учрашувини ўтказиш муҳим экани таъкидланди.
Аввалроқ Шавкат Мирзиёев Кўксаройда бир гуруҳ ватандошларга давлат мукофотларини топширгани, «Ватандошлар» жамғармасини ташкил этиш ва 30 июлни Ўзбекистонда «Халқлар дўстлиги куни» деб белгилашни таклиф қилгани ҳамда 2021 йилни Ёшларни қўллаб-қувватлаш ва аҳоли саломатлигини мустаҳкамлаш йили деб эълон қилгани ҳақида хабар берилганди.
Изоҳ (0)