Қозоғистон президенти Қосим-Жўмарт Тўқаевнинг таъкидлашича, Марказий Осиёда Қозоғистон ва Ўзбекистон асосий давлатлар саналади. Мамлакатлар ўртасида ҳамкорлик алоқалари кенг ривожланмоқда, иқтисодий рақобатга киришиш эҳтимоли ҳам йўқ эмас. Бу ҳақда Қосим-Жўмарт Тўқаев «Ана тили» нашрига берган интервьюсида маълум қилди.
Қосим-Жўмарт Тўқаев икки давлат ўртасидаги иқтисодий рақобат эҳтимоли ҳақида гапириб, «Бу ҳақда ҳеч қачон унутмаслигимиз керак. Қозоғистон ўзининг етакчилик мавқейини сақлаб қолишга мажбур», деган.
Қозоғистон президенти интервьюда қозоқ тилини оммалаштириш, рус тили истиқболлари ҳақида гапирган. Қозоғистон раҳбари, ўз навбатида, Ўзбекистон борасида ҳам қатор фикрларни билдириб ўтган. У, масалан, рус тили борасида Ўзбекистон тажрибаси яхши намуна бўлиб хизмат қилишини қайд этган.
«Ўзбеклар ўзларига хос вазминлик ва ҳурмат билан, баландпарвоз баёнотларсиз тил масаласини ҳал этди. Зарур бўлганда, рус тилига мурожаат қилинди. Ҳалигача Ўзбекистон давлат идораларида рус тилидан фойдаланишлари мени ҳайратлантирди. Ушбу халқнинг бутун прагматизми шунда намоён бўлади. Улар бутун тарих давомида шундай бўлиб келган», — дея таъкидлаган Тўқаев.
Унинг қайд этишича, ўзбеклар ижтимоий муносабатларни сиёсийлаштиришдан қочган ҳолда, меҳнат ва савдога асосий урғуни бериб, ХХ асрнинг бошида Марказий Осиёнинг энг йирик халқига айланган. Шунинг учун ҳам буюк Абайнинг ўзбек халқи ҳақидаги доҳиёна сўзлар технология даврида ҳам ўз аҳамиятини йўқотмаяпти. Ушбу мамлакат митинглар билан эмас, бунёдкорлик билан шуғулланаяпти.
Маълумот учун, 2020 йилнинг январь—май ойларида Ўзбекистон ва Қозоғистон ўртасидаги ташқи савдо айланмаси 1,091 миллиард долларни ташкил қилган, Ўзбекистон шу даврда Қозоғистонга 317,4 миллион долларлик маҳсулот ва хизматларни эксорт қилган бўлса, 773,8 миллион долларлик импортни амалга оширган. Ташқи савдо айланмаси ҳажми бўйича Қозоғистон Ўзбекистоннинг учинчи энг йирик ҳамкорл ҳисобланади.
Изоҳ (0)