Қозоғистон парламенти фуқаролик тақдим этилиши тўғрисидаги қонунга тузатишлар ишлаб чиқди, уларга мувофиқ, ариза берувчининг қозоқ тилини билмаслиги унга рад жавоби берилиши учун асос бўлиб хизмат қилиши мумкин. Бу ҳақда мамлакат бош вазири Алихон Смоилов россиялик муҳожирлар билан боғлиқ вазиятдан хавотирда бўлган депутатларнинг сўровига жавобан маълум қилди.
«Айни пайтда ‘Қозоғистон Республикаси фуқаролиги тўғрисидаъги қонунга тузатишлар ишлаб чиқилган, уларда давлат тилини, тарих асосларини ва миллий қонунчиликни билмаслик фуқароликка қабул қилишни ва фуқароликни қайта тиклашни рад этишда қўшимча асослар сифатида кўзда тутилади», — деди Вазирлар маҳкамаси раҳбари. Бундан ташқари, ҳужжатда қўш фуқаролик ҳолатларига йўл қўймасликка қаратилган тузатишлар ҳам бор.
Шунингдек, Алихон Смоилов мамлакатга келаётган россияликлар сони барқарорлашиб, нормал ҳолатга қайтганини маълум қилди.
Октябрь ойида Россиядан Қозоғистонга келган фуқаролар сони 65 фоизга камайди. Бу рақам Смоиловнинг Қозоғистондаги россияликлар сонига аниқлик киритишни сўраган депутатларнинг октябрь ойидаги мурожаатига берган жавобида келтирилган.
Россия федерал хавфсизлик хизмати маълумотларига кўра, ноябрь ойи бошида Қозоғистон россияликларнинг кетиши учун энг машҳур йўналишлар учлигига кирди. Июль-сентябр ойларида деярли 1,3 миллион киши Россиядан Қозоғистонга ўтган.
Изоҳ (0)