Тошкент шаҳар ҳокимлиги ташқи реклама ва ахборот конструкцияларини жойлаштириш соҳасида тартибни таъминлаш бўйича ишларни тизимли равишда давом эттираётганини маълум қилди.
Шаҳар инфратузилмаси таҳлилига кўра, рухсатсиз ўрнатилган реклама шитлари, баннерлар ва пешлавҳалар ободонлаштириш қоидаларини бузиб, пойтахт кўчалари ва туманларининг кўринишини бузмоқда.
Шунингдек, пиёдалар йўлаклари ва йўл четларини тўсиб қўйиб, айниқса кам ҳаракатланувчи фуқароларнинг юришини қийинлаштирмоқда. Шу билан бирга, йўл ҳаракати хавфсизлигига хавф туғдириб, йўл белгиларини кўришга халақит бермоқда.
Бундан ташқари, муҳандислик тармоқларига, жумладан суғориш каналларига зарар етказиб, ёмғирли мавсумда ҳудудларнинг сув босишига сабаб бўлмоқда.
Қонунийликни таъминлаш ва пойтахтнинг меъморий яхлитлигини сақлаш мақсадида махсус хизматлар тегишли рухсат ҳужжатлари бўлмаган реклама конструкцияларини олиб ташламоқда, дея қўшимча қилинган ҳокимлик хабарида.
Пойтахт ҳокимлиги бизнес эгалари, якка тартибдаги тадбиркорлар ва ижарачиларга мурожаат қилган:
- Реклама объектларингиз — баннерлар, кўрсаткичлар, конструкцияларни жойлаштириш учун расмий рухсатнома борлигига ишонч ҳосил қилинг.
- Жойлаштирилган рекламалар техник талабларга жавоб бериши ва пиёдалар ҳамда транспорт воситаларининг ҳаракатига тўсқинлик қилмаслигига ишонч ҳосил қилинг.
- Қоидабузарлик ҳолатлари аниқланса, жарималар ва қўшимча харажатлардан қочиш учун объектларни ўзингиз бартараф этинг.
Ташқи рекламани жойлаштириш учун ягона қонуний асос Тошкент шаҳри ваколатли органлари томонидан берилган ҳужжатлар эканлиги эслатиб ўтилган.
Изоҳ (0)