Ҳиндистон ва Бангладеш орасидаги бир неча ойлик оғзаки тортишувлардан сўнг қатъий савдо чекловлари жорий этилди. Бу тадбиркорлар фаолиятига салбий таъсир қилмоқда. Бу ҳақда BBC хабар қилди.
2025 йилнинг апрель ойида Бангладеш маҳаллий саноатни арзон импортдан ҳимоя қилиш мақсадида Ҳиндистон пахта ипининг қуруқликдаги импортини чеклаб қўйган эди.
Август ойида бенгал собиқ бош вазири Шайх Ҳасина оммавий норозилик намойишларидан сўнг лавозимидан четлатилган эди. Шундан бери икки мамлакат ўртасидаги муносабатлар анча ёмонлашди. Бангладеш ҳозирча тинчлик бўйича Нобель мукофоти совриндори Муҳаммад Юнус бошчилигидаги вақтинчалик маъмурият қўлида.
Мамлакатлар ўртасидаги муносабатлар ёмонлашгани сайин, бизнесларнинг ҳам аҳволи танг бўлиб бормоқда. Бангладеш кийим-кечак фабрикалари учун муҳим бўлган ип ҳали ҳам денгиз ва ҳаво йўллари орқали етказиб берилади. Лекин бу жараён секинлашиб, нарх ошиб кетган.
Ҳиндистон 2024 йилда Бангладешга 1,6 миллиард долларлик пахта ипини экспорт қилган, унинг учдан бир қисми қуруқлик портлари орқали олиб ўтилган.
Бангладеш нуфузли брендлар учун ишлаб чиқарган кийимларини Ҳиндистон орқали Европа ва АҚШга экспорт қиларди. Ҳозирда, бу жараён ҳам тўхтаб қолган.
Бу Бангладешнинг тезкор экспорт саноатига зарба бўлди. Ҳиндистон орқали юклар бир ҳафтада Ғарбга етиб борса, денгиз орқали бу муддат саккиз ҳафтага чўзилади, дейди Зара каби брендлар учун юк ташиш билан шуғулланувчи MGH Group таъминот занжири фирмаси раҳбари Анис Аҳмед.
Унинг таъкидлашича, кийим-кечак экспорти бўйича дунёда Хитойдан кейин иккинчи ўринда турувчи Бангладеш ўтган йили 38 млрд долларлик кийим-кечак экспорт қилган. Шундан 1 миллиард доллардан ортиғи Ҳиндистон қуруқлик-ҳаво йўли орқали амалга оширилган.
Бангладешда Ҳиндистон визаси қийинлаштирилгани боис норозилик кучайиб бормоқда. Ҳасина ҳокимиятдан четлатилгандан бери виза олиш суръати пасайиб кетди.
Илгари йилига икки миллион бангладешлик Ҳиндистонга сайёҳлик, бизнес, таълим ва тиббий ёрдам учун ташриф буюрган. Маҳаллий ОАВ маълумотларига кўра, сўнгги бир неча ой ичида кунига бериладиган визалар сони 80 фоиздан ортиққа камайган.
Ҳиндистоннинг кийим-кечак ишлаб чиқарувчилар уюшмаси кескинлик кучайиб бораётган бир пайтда Бангладешдан қуруқлик орқали кийим-кечак импортини тақиқлашга чақирди. Бангладешлик таҳлилчилар огоҳлантиришича, бундай савдо тўсиқлари савдо самарасини тушириб юборади.
Ҳиндистон Бангладеш портлари, йўллари ва сув йўлларидан ўзининг денгизга чиқиш йўли бўлмаган шимоли-шарқий ҳудудларига юк ташиш учун фойдаланади. Бу масофа, вақт ва харажатларни камайтиради. Бироқ расмийларнинг айтишича, транзит ҳажми кутилган даражага етмаган.
Бангладеш ва Покистон ўртасидаги алоқалар ўсиб бораётган бир пайтда Ҳиндистон ва Покистон муносабатлари кескинлашмоқда.
Изоҳ (0)