Бангладешда мамлакат бош вазири Шайх Ҳасина истеъфога чиқиши ортидан Нобель мукофоти лауреати Муҳаммад Юнус иштирокида муваққат ҳукумат тузилади. Бу ҳақда BBC нашри Даккадаги манбаларга асосланиб, хабар берди.
Манбада айтилишича, Муҳаммад Юнус аллақачон вақтинчалик ҳукумат раиси этиб тайинланган. Эндиликда қилиниши керак бўлган ягона вазифа эса ҳукумат таркибини тузиб чиқиш. Мамлакат аҳолиси эркин фикрли ва халқпарвар Муҳаммад Юнусга ишонч билдирган.
Муҳаммад Юнус ғалаёнлар оқибатида ҳокимиятдан кетишга мажбур бўлган Шайх Ҳасинанинг азалий рақиби бўлган. Икки сиёсий қараш ва тушунча тарафдорлари бўлган рақиблар узоқ муддат ҳокимият учун даъво қилиб келган.
Муваққат давлат раҳбари ҳозирда 84 ёшда. У микрокредит бериш тизимини кенг ёйиш орқали давлат ва жамият учун манфаатли бўладиган келишувлар тузишга имкон берадиган дастур ишлаб чиққан. Собиқ бош вазир Шайх Ҳасина эса бу тизимни самарасиз, Муҳаммад Юнусни эса “халқ душмани” деб атаган.
Профессор Муҳаммад Юнусни муваққат ҳукуматнинг раҳбари этиб тайинлаш тўғрисидаги қарор Бангладеш президенти Муҳаммад Шаҳобиддин, ҳарбий раҳбарлар ва талабалар етакчилари ўртасидаги учрашувдан сўнг қабул қилинган. Иқтисод ва молия тизимини яхши тушунувчи, кекса бўлса-да, аҳоли ва халқаро ҳамжамият олдида катта обрўга эга бўлган шахс мамлакатдаги норозилик тўлқинларини тўхтатишда муҳим рол ўйнаши мумкинлиги айтилган.
Муҳаммад Юнус ҳозирда Париждан Даккага қайтаётгани маълум қилинган. У аввалига тиббий муолажадан ўтади ва сўнгра омма олдида кўриниш беради.
Маълумот ўрнида, профессор Муҳаммад Юнус 1940 йил 28 июнда туғилган. У ижтимоий тадбиркор, банкир, иқтисодчи ва фуқаролик жамияти етакчиси сифатида танилган. Grameen банкига асос солгани ҳамда микрокредит ва микромолия тушунчаларини яратгани учун тинчлик йўналишида Нобель мукофоти билан тақдирланган. У ишлаб чиққан тизимда маблағлар анъанавий банк кредитларини олиш учун аҳолининг ўта камбағал қатламларига берилади ва қашшоқликка қарши курашда муҳим аҳамият касб этади.
Изоҳ (0)