Норозиликлар ортидан истеъфога чиқиб, хорижга қочган Бангладешнинг собиқ бош вазири Шайх Ҳасина яна мамлакатга қайтишини маълум қилган. Бу ҳақда Шайх Ҳасинанинг ўғли берган маълумотга асосланиб, Reuters нашри хабар берди.
![](/static/2024/08/09/reuters1-8-fCmukh.jpg)
Манбада айтилишича, Шайх Ҳасина янги муваққат ҳукумат сайловлари ўтказилиши эълон қилингач, мамлакатга қайтиш қарорига келган. Собиқ бош вазирнинг ортга қайтишдан мақсади сиёсий раҳбариятга қайтиш ёки бошқа эканлиги ҳозирча аниқ эмас.
Бангладешда бир неча ҳафта давом этган норозилик намойишлари ортидан Ҳасина хоним 5 август куни Ҳиндистонга қочиб кетган эди. Шундан сўнг эса мамлакатнинг илғор элитаси ва намойишчилар тинчлик бўйича Нобель мукофоти совриндори Муҳаммад Юнусни Даккага чақириб, у бошчилигида муваққат ҳукумат тузган.
Муҳаммад Юнус вақтинчалик вазифага киришиш олдидан халқ олдида расман қасамёд қилган. Унга сайловларни ўтказиш ва бош вазир сифатидаги вазифаларни бажариб туриш топширилган.
Шайх Ҳасинанинг АҚШда истиқомат қилувчи ўғли Сажиб Вазид муваққат ҳукумат сайловлар ҳақида қарор қабул қилса, Шайх Ҳасина Даккага қайтишини билдирган. Ҳозирда Ҳасина хоним Ҳиндистонда экани ва юртига қайтишга тайёргарлик кўраётгани хабар берилган.
“Ҳозирча у (Шайх Ҳасина) Ҳиндистонда. Муваққат ҳукумат қарор қабул қилган пайтда у Бангладешга қайтади”, — дея маълум қилган Сажид Вазид.
Бангладешдаги бир гуруҳ сиёсат арбоблари Шайх Ҳасинанинг мамлакатга қайтиши хавфли эканини билдирган. Чунки 76 ёшли собиқ раҳбарга нисбатан мамлакатнинг кўплаб ҳудудларида нафрат кучайиб кетган. Фуқаролар унинг умрбод мамлакатга қайтмаслигини талаб қилишмоқда.
Маълумот ўрнида, Бангладешда адолатсиз меҳнат квотасига эътироздан бошланган ғалаёнлар оқибатида ҳозирга қадар 400 дан ортиқ фуқаро ҳалок бўлган. Шайх Ҳасина ҳукумати муваффақиятсизлиги ортидан унинг “Авами лигаси” партияси ҳам кутилмаган йўқотишларга учради. Аҳоли намойишлари бош вазир саройининг ишғол этилиши ва ҳукуматнинг тарқатилиши билан қисман пасайди.
Изоҳ (0)