WBC, WBA ва WBO камарлари соҳиби, оғир вазн тоифасидаги мағлубиятсиз серия қайд этиб келаётган украиналик боксчи Олександр Усик (23 ғалаба, 14 нокаут) яна икки жанг ўтказиб, рингдаги фаолиятини якунлашини маълум қилиши мумкин. Бу ҳақда The Stomping Ground You Tube саҳифасида хабар берилди.
Биринчи жанг аллақачон режалаштирилган: 2025 йил 19 июль куни Лондонда бўлиб ўтади. Усик ўша куни британиялик Даниэль Дюбуа (22 ғалаба, 2 мағлубият, 21 нокаут)га қарши реванш жангини ўтказади. Ушбу бокс оқшомидаги ғалаба Усикка мутлақ жаҳон чемпиони унвонини тақдим этади. Эслатиб ўтамиз, уларнинг илк тўқнашуви 2023 йил август ойида Польшада бўлиб ўтган ва Усик 9-раундда рақибини нокаутга учратганди.
Усик Дюбуа билан реванш жангидан сўнг хайрлашув учрашувини режалаштирган. Бу баҳсда иккита эҳтимолий рақиб номини тилга олган: Тайсон Фьюри ёки Энтони Жошуа.
Таъкидлаш жоиз, украиналик боксчи аввалроқ Жошуа (2021 ва 2022 йилларда) ва Фьюрини (2024 йилда) мағлуб этган. Ҳар учала жангда Усик ҳакамлар қарори билан ғалаба қозонган.
Изоҳ (0)