Madridning “Real” klubi yarim himoyachisi Luka Modrich ingliz klublaridan biri — “Suonsi Siti” aksiyalarining bir qismiga egalik qilishi mumkin. Bu haqda futbol insayderi Fabrisio Romano xabar bermoqda.
Manbaga ko‘ra, 39 yoshli xorvatiyalik futbolchi bilan kelishuv allaqachon yakunlangan va u klub aksiyalarining kichik qismini sotib oladi. Bu holat Modrichning faoliyatiga ta’sir qilmaydi. U keyin ham “Real” safida o‘ynashni davom ettiradi.
Ma’lumot uchun, Modrich avvalroq Angliya Premyer Ligasida to‘p surgan. Yarim himoyachi 2008-yildan 2012-yilgacha “Tottenhem” sharafini himoya qilgan. Keyin Madridning “Real” klubi bilan shartnoma imzolab, ko‘plab sovrinlarga ega chiqqan.
Modrichning “qaymoqranglilar” bilan amaldagi shartnomasi 2025-yilning iyuniga qadar mo‘ljallangan. Xorvatiyalik futbolchiga Saudiya klublaridan moliyaviy yaxshi taklif bor, lekin futbolchi faoliyatini “qirollik klubi” tarkibida yakunlashni maqsad qilgan. Shu bois u klub bilan yana bir mavsumga mo‘ljallangan bitim tuzish arafasida turibdi.
Izoh (0)