2022 йил ким учундир унутилмас, қувончли лаҳзаларга бой бўлди, кимлардир учун синовли келди, яна кимлардир эса бу ёруғ оламни тарк этди. Йўқотилган инсонлар орасида санъат ва маданият соҳасида сермаҳсул ижод қилиб, мухлислари қалбидан жой олган машҳурлар ҳам бисёр.
Санобар Матмуродова
Ўзбекистонда хизмат кўрсатган артист Санобар Матмуродова 11 январь санасида бу ёруғ оламни тарк этди.
Халқ ардоғидаги хонанда Санобар Матмуродова 1968 йилда Хоразм вилоятининг Боғот туманида туғилган. Ўзбекистон халқ артисти Олмахон Ҳайитовага шогирд тушган.
Хонанда 1994 йилда Самарқанд давлат университетининг мусиқа факультетида таҳсил олган ва шундан кейин Ўзбекистон давлат филармонияси Самарқанд вилоят бўлинмасида иш фаолиятини олиб борган. Санобар Матмуродова «Акажон», «Онам дерман», «Сан гарак» каби бир қатор қўшиқлари ўзбек халқи томонидан севиб тингланади.
Шароф Бошбеков
Ўзбекистонда хизмат кўрсатган маданият ходими, «Меҳнат шуҳрати»ордени соҳиби, таниқли драматург, Ўзбекистон Ёзувчилар уюшмаси аъзоси Шароф Бошбеков 2022 йилнинг 26 январь куни оламдан ўтди.
Шароф Бошбеков 1951 йил 4 январда Самарқанд вилояти Булунғур тумани Ғубир қишлоғида туғилган. 1974 йили Тошкент театр ва рассомчилик санъати институтини тамомлаган. Унинг «Темир хотин» комедияси нафақат республикада, балки бошқа мамлакатлар театрларида ҳам саҳнага қўйилди. Адиб драма ва киноқиссалардан иборат «Танланган асралар» китоби учун 2021 йили Ўзбекистон Ёзувчилар уюшмасининг «Йилнинг энг яхши асари» танлови ғолиби бўлди.
Шароф Бошбеков 1996 йили «Ўзбекистонда хизмат кўрсатган маданият ходими» фахрий унвони, 2001 йили «Меҳнат шуҳрати» ордени билан тақдирланган.
Вилоят Оқилова
Ўзбекистон халқ артисти Вилоят Оқилова 2 февраль куни 84 ёшида вафот этди.
Вилоят Оқилова 1937 йил 12 октябрда Самарқанд вилоятида, Ўзбекистон халқ артисти Исохор Оқилов оиласида туғилган. 1958—1994 йилларда Ўзбекистон Давлат филармониясида раққоса, балетмейстер, 1994—1996 йилларда «Туркистон» саройида, 1996 йилдан Ўзбекистон хорижий мамлакатлар билан маданий-маърифий алоқалар жамиятида балетмейстер бўлган.
Раққоса сифатидаги фаолияти давомида «Занг», «Ларзон», «Шодлик», «Хоразм лазгиси», «Тожик гўзали», «Помир рақси», «Афғонча», «Дилрабо», «Шодиёна» каби бир қанча рақсларни ижро этган.
Жўрахон Пўлатов
Ўзбекистонда хизмат кўрсатган артист Жўрахон Пўлатов 16 февраль куни 88 ёшида бу ёруғ оламни тарк этди.
Жўрахон Пўлатов 1934 йилда Фарғона вилоятининг Қўқон шаҳрида таваллуд топган. У аския соҳасида сермаҳсул ижод қилган. Аскиячи узоқ йиллар маданият соҳасининг турли йўналишларида, хусусан, Қўқон шаҳар мусиқали драма театрида фаолият юритди.
Тўти Юсупова
Ўзбекистон халқ артисти Тўти Юсупова 2022 йилнинг 15 март санасида 86 ёшида вафот этди.
Маълумот учун, Тўти Юсупова 1936 йилнинг 10 март куни Самарқанд вилоятида таваллуд топган. Тошкент театр ва рассомлик институтини тамомлаган. 1957 йилдан ўзбек миллий академик драма театрида фаолият юритган. Шунингдек, актриса кинода самарали фаолият юритган.
Тўти Юсупова 1994 йилда Ўзбекистон халқ артисти унвонини олган, 2020 йилда «Меҳнат шуҳрати» ордени билан тақдирланган.
Марям Ихтиёрова
Ўзбекистон халқ артисти Марям Ихтиёрова 22 март куни бу ёруғ оламни тарк этди.
Маълумот учун, Ўзбекистон халқ артисти Марям Ихтиёрова 1939 йил Хоразм вилояти, Янгибозор туманида дунёга келган. 1959 йилдан бугунга қадар Муқимий номидаги Ўзбек давлат мусиқали театри актрисаси сифатида фаолият юритган. 1997 йили Ўзбекистон халқ артисти унвонига сазовор бўлган эди.
Лутфулла Саъдуллаев
Ўзбекистон халқ артисти Лутфулла Саъдуллаев 10 апрель куни вафот этди.
Лутфулла Саъдуллаев 1940 йил 18 декабрда Тошкент шаҳрида туғилган. 1965 йил Тошкент театр ва рассомчилик санъат институтини тугатган. 1963—2007 йилларда Республика ёш томошабинлар театри, Абдулла Қаҳҳор номидаги сатира театрларида актёр бўлиб фаолият кўрсатган.
Фаолияти давомида 200 га яқин спектаклларда бир-биридан эсда қоларли роллар ижро этади. Лутфулла Саъдуллаев узоқ йиллик ижодий фаолиятида давомида ўз ҳаёти ва ижодидан ҳикоя қилувчи, устозлари, марҳум ҳамкасблари ҳақидаги хотиралари жамланган «Қисмат», «Ўкинч», «Мени кечир» номли китобларини нашрдан чиқарган.
Равшан Намозов
Ўзбекистонда хизмат кўрсатган артист Равшан Намозов 2022 йилнинг 24 сентябрь санасида бу ёруғ оламни тарк этди.
Ўзбекистонда хизмат кўрсатган артист Равшан Намозов 1961 йилнинг 10 июлида Сурхондарё вилоятининг Термиз шаҳрида туғилган. Термиз мусиқа билим юртини тамомлаб, отаси — Ўзбекистонда хизмат кўрсатган артист Абдураҳмон Намозов ва Шокир Маҳмудовлардан сабоқ олган. У фаолиятини 1989 йили ташкил этилган «Қарс» гуруҳида бошлаган.
У 1985 йил Германия ўтказилган «Ёшлар фестивалида» ва 1989 йили Олмаота шаҳрида ташкил этилган «Осиё овози» кўрик танловида Гранд-Прини қўлга киритган. 1991 йилдан буён яккахон ижод қилаётган хонанда 1993 йили Ўзбекистонда хизмат кўрсатган артист унвони билан тақдирланган.
Даврон Ғойипов
Ўзбекистонлик таниқли роk-pop юлдузи Даврон Ғойипов 7 октябрь куни, ўз туғилган кунида вафот этди.
Даврон Ғойипов 1961 йил 7 октябрда туғилган. Мактабни битирганидан кейин 1978 йилда у «Ялла» гуруҳига бас гитарачи сифатида таклиф қилинади. 1980 йилда Даврон Ғойипов бошчилигида Ўзбекистондаги илк рок гуруҳи — «Оригинал» тузилади. 1980 йиллар бошларида ижро этилган «Бу нима бу?» қўшиғи гуруҳга катта машҳурлик олиб келган. Қўшиқ асосида кейинроқ фильм ишланган ва бош ролни Даврон Ғойипов ижро этган.
Бундан ташқари «Қайдасан», «Керак эмас шаҳло кўзларинг», «Откритое окно» каби қўшиқлар ҳам мухлислар кўнгилларидан жой олган.
Ҳайдар Муҳаммад
Ўзбекистон Ёзувчилар уюшмаси аъзоси, таниқли шоир ва драматург, «Дўстлик» ордени соҳиби Ҳайдар Муҳаммад 9 октябрь куни 86 ёшида ёруғ оламни тарк этди.
Ҳайдар Муҳаммад 1936 йили Тошкентда туғилган. 1966 йилда Низомий номидаги Тошкент давлат педагогика институтининг кечки филология бўлимини тугатган. 1965—1976 йилларда Ўзбекистон телерадиосида муҳаррир, 1976—1980 йилларда Маданият ишлари вазирлигида масъул вазифаларни бажарган. Кўп йиллар Ҳамза номли Академик драма театрида адабий эмакдош вазифасида хизмат қилган.
Драматург таржимасида озарбайжон драматурги Анорнинг «Занжир ёки қиёфалар» (Муқимий театри), туркман драматурги Ҳ. Мухторнинг «Неварали келин» (Самарқанддаги Ҳ. Олимжон номли театр), бошқирд драматурги Фарид Богдановнинг «Тунги меҳмон» (Ҳамза номли ўзбек Давлат академик драма театри) каби асарлари ўзбек саҳнасига чиққан.
Жасур Рафиқов
«Уммон» гуруҳининг собиқ хонандаси 14 ноябрь куни саратон касаллигидан вафот этди.
Маълумот учун, хонанда Жасур Рафиқов 1991 йилнинг 30 сентябрь санасида Тошкент шаҳрида таваллуд топган. У болаликдан бирга вояга етган дўстлари Зоҳид Рисқиев ва Шоҳрух билан «Уммон» гуруҳида ижод қилиб кўплаб хит тароналарни ижро этган.
Гуруҳ 2007 йилда «Сокин тун» номли таронасини оммага тақдим этгандан кейин машҳурликка эришди. «Уммон» гуруҳининг «Қандай унутдинг», «Йўқ», «Бойлик», «Дўст», «Ким дея» тароналари ва бошқа кўплаб мусиқалари миллионлаб мухлисларнинг қалбидан жой олди.
Мавзуга доир:
Изоҳ (0)