10 сентябрь, пайшанба куни Гиннеснинг Рекордлар китобининг 2016 йилги янги нашри чиқди. Китоб муаллифлари янги нашрга киритилган энг ноёб рекордларни тақдим этди. Бу ҳақда Meduza хабар беради.
Берти лақабли тошбақа ўз турдошлари орасида энг тез югурувчи тошбақа сифатида рекорд ўрнатди. 2014 йилнинг июлида у бир сония мобайнида 28 сантиметр (соатига 0,97 километр) масофани босиб ўтиб, 1977 йилги рекордни янгилади.
Пурин лақабли кучук эса панжалари билан тўп тутиб олиш бўйича рекорд ўрнатди. У бир дақиқада 14 та тўпни тутиб олиб, ўзининг 11 та тўпдан иборат рекордини янгилади.
Икки ёшли англиялик ангор қуёни – Франческа қуёнлар орасида «энг узун юнг соҳиби» номини олди. Унинг юнги узунлиги 36,5 сантиметрни ташкил этади.
Шохларининг узунлиги 292,1 сантиметрни ташкил этувчи «Катта Қизил 907» буқа ҳам Гиннеснинг Рекордлар китобига киритилди.
Хитойлик спортчилар Сунь Минмин ва Сюй Янь – энг баланд бўйли жуфтлик сифатида қайд этилди. Уларнинг биргаликдаги бўйи 423,47 сантиметрдан иборат. Минмин баскетболчи, Янь эса гандболчидир.
20 ёшли венесуэлалик Жейсон Орландо Родригез Хернандез – энг катта оёқлар соҳибидир. Унинг ўнг оёғи узунлиги 40,1 сантиметр, чапи эса 39,6 сантиметрдир.
Энг баланд ковбой этиги ҳайкалини 72 ёшли Боб Уэйд Техаснинг Сан-Антонио шаҳрида ўрнатди. Этикларнинг баландлиги – 10,4 метр.
Энг катта хот-дог ташувчи аравача америкалик 44 ёшли Маркус Дэйли томонидан яратилди. Баландлиги 3,72 метр, узунлиги 7,06 метр ва эни 2,81 метрни ташкил этувчи аравача Дейлига кунига 300 кишига хизмат кўрсатиш имконини беради.
Германиялик Андре Ортольф Гиннеснинг Рекордлар китобида уч марта қайд этилди: у юз метрлик масофани чанғи оёқ кийимида (17,65 сония) ва ёғоч бошмоқларда (16,27 сония) энг тез югуриб ўтди.
У, шунингдек, нўхат донасини энг узоқ масофага – 7,51 метрга тупурган.
Ҳиндистонликлар 5,5 метр узунликдаги ва 37 килограмм оғирликдаги энг катта шарикли ручка билан рекорд ўрнатди.
Ҳиндистонлик 27 ёшли Виджай Кумар оғзидаги 37 та тиши билан рекорд ўрнатди.
Изоҳ (0)