Amerikaning Filadelfiya shahridagi hayvonot bog‘ida yashovchi, yo‘qolib ketish xavfi ostida turgan Galapagos toshbaqalari juftligi salkam 100 yoshda ilk bor farzandli bo‘ldi.
Hayvonot bog‘i xabariga ko‘ra, urg‘ochi toshbaqa tomonidan qo‘yilgan tuxumlardan birinchi toshbaqa 27-fevral kuni chiqqan, undan so‘ng esa tez orada qolganlari ham dunyoga keldi. Ularning har biri 70–80 gramm atrofida, ya’ni tovuq tuxumi og‘irligida.
Hayvonot bog‘i xodimlari hali yorilmagan tuxumlar ustidan kuzatuv olib borishyapti — yaqin haftalarda yana toshbaqalar yorib chiqishi mumkin.
Olimlarning aytishicha, ona toshbaqa hozirda 97 yoshda. “U 1932-yilda hayvonot bog‘iga keltirilgan, demak, oxirgi 92 yil davomida bu bog‘ga kelgan deyarli har bir tashrifchi uni ko‘rgan bo‘lishi mumkin”, deydi Filadelfiya hayvonot bog‘i direktori Jo-Elle Mogerman.
Uning jufti Abrazzo 2020-yilda Filadelfiyaga ko‘chirilgan (avval Janubiy Karolinadagi hayvonot bog‘ida yashagan). Olimlarning fikricha, uning yoshi 96 da.
| Video manbasi: | 6abc Philadelphia YouTube kanali |
Hozircha chaqaloq toshbaqalar tashrif buyuruvchilardan yiroqda saqlanmoqd va ular “sog‘lom ovqatlanib, yaxshi rivojlanmoqda”, deyiladi bog‘ bayonotida. Rejaga ko‘ra, ular 23-aprel kuni ommaga ilk bor namoyish etiladi.
Filadelfiya hayvonot bog‘ining ta’kidlashicha, bu — 150 yillik tarixda ilk marta Galapagos toshbaqasi chaqaloqlari dunyoga kelgan holat bo‘lib, ona toshbaqa o‘z turining eng yoshi katta birinchi bor ona bo‘lgan vakiliga aylandi.
“Bu — Filadelfiya hayvonot bog‘i tarixidagi muhim bosqich. Ushbu yangilikni shahrimiz, mintaqamiz va butun dunyo bilan bo‘lishishdan juda baxtiyormiz,” deya bayonot berdi Mogerman.
Galapagos toshbaqalari yovvoyi tabiatda yo‘qolib ketish xavfi ostida turgan hayvonlar ro‘yxatiga kiritilgan. Hozirda AQSHdagi hayvonot bog‘larida 50 dan kam bunday toshbaqa bor. Bu turdagi toshbaqalar oxirgi marta 2019-yilda AQSHdagi Janubiy Karolinadagi Riverbanks hayvonot bog‘ida tug‘ilgan edi.
San Diego hayvonot bog‘i saytida yozilishicha, Galapagos toshbaqalari butun umri davomida ko‘payish qobiliyatini saqlab qoladi. Ularning aniq umr ko‘rish muddati noma’lum, biroq bu turdagi toshbaqalardan biri hatto 171 yil yashagan.
Izoh (0)