Покистон қуролли кучлари таркибида ракета қўшинларини ташкил этишни режалаштирмоқда. Бу ҳақда бош вазир Шаҳбоз Шариф маълум қилди.
Вазир бу баёнотни Ҳиндистон билан май ойида бўлган тўқнашув хотирасига бағишланган маросимда айтди.
Улар (ракета қўшинлари) энг замонавий қурол-аслаҳалар билан таъминланади, деди Шариф.
У бу кучлар Покистон армиясининг жанговар қобилиятини мустаҳкамлашда янги босқич бўлишини таъкидлади. Хавфсизлик хизматининг юқори лавозимли вакили бу кучлар алоҳида қўмондонликка эга бўлишини айтди.
Шубҳасиз, бу (ракеталар) Ҳиндистонга қарши мўлжалланган, дея қўшимча қилди у.
Ҳиндистон бош вазири Нарендра Моди 2 август куни Покистонга нисбатан таҳдидли баёнот берганди. У Покистоннинг келажакдаги ҳар қандай ҳужумига “қатъий қасос” билан жавоб қайтарилишини айтган.
Покистондагиларни тунда беҳаловат қилиш учун БраҳМос номини тилга олишнинг ўзи кифоя, деган эди ўшанда Моди.
Товушдан тез учадиган БраҳМос қанотли ракеталари қуруқлик, денгиз ва ҳаво базаларига мўлжалланган вариантларда ишлаб чиқарилади.
Покистон ва Ҳиндистон тўқнашуви
Икки давлат ўртасидаги муносабатлар 2025 йил апрелида “Қаршилик фронти” жангариларининг Кашмирда сайёҳларга ҳужум қилиб, 26 кишининг ўлимига сабаб бўлгач, кескинлашди. Ҳиндистон ҳужумда Покистонни айблади, расман Камшир ҳужумда иштирок этмаганини айтиб, айбловни рад этди. Ҳиндистон Покистон билан 1960 йилдаги муҳим сув шартномасини тўхтатди ва ягона қуруқликдаги чегара ўтиш пунктини ёпди.
6 май куни Ҳиндистон “Синдур” операциясини бошлаб, Панжоб ва Покистоннинг Кашмир қисмига ракета зарбалари берди. Покистон бунга жавобан ўт очди ва 10 май куни Ҳиндистон базалари, аэродромлари ҳамда ракета омборига ҳужум қилди. Тегишли операция “Банян-ул-Марсус” деб номланди. Можаронинг энг кескин нуқтаси, турли манбаларга кўра, 125 тагача қирувчи самолёт иштирок этган кенг кўламли ҳаво жанги бўлди.
10 май куни томонлар АҚШ воситачилигида ўт очишни тўхтатишга келишди. 88 соат давом этган можаро якунида Ҳиндистон 100 дан ортиқ жангчи йўқ қилингани, 5 нафар ҳарбий ва 16 нафар тинч аҳоли ҳалок бўлганини билдирди. Покистон эса 13 нафар ҳарбий ҳамда 40 нафар тинч аҳоли, жумладан, аёллар ва болалар ҳалок бўлгани, 78 нафар ҳарбий яраланганини маълум қилди.
Изоҳ (0)