Ташқи кўриниши билан бир нечта суперкарларни ёдга солувчи Pagani Zonda намойиш этилди

Инсайдерлик савдолари бўйича бир неча йил олдин жаримага тортилган Майк Инь исмли трейдер ўзининг янги автомобили — Pagani Zonda AY суперкарини намойиш этди. Аввалига у Zonda F Roadster бўлган, аммо олиб борилган қўшимча ишлар давомида унга Горацио Паганининг бир қанча услубий ечимлари қўшилган: хусусан, Zonda 760 JC’ни ёдга солувчи аэродинамик «накладка»ли фаралар ўрин олган, деб хабар беради Motor.

Маълумотларга кўра, 650 от кучини тақдим этишга қодир 6,3 литрли V12 двигатели билан жиҳозланган Zonda F Roadster модели ноёб Zonda AY’нинг асосига айланган. Модификациядан кейин суперкар худди «иқтибослар жамланмаси»га ўхшаб қолган. Масалан, аэродинамик «накладка»ли фаралар Хитойнинг Zonda 760 JC’ники каби, орқа қанотлардаги ҳаво панжаралари Zonda R’ники, массив антиқанотини эса Zonda Oliver’дан олган.

https://www.instagram.com/p/CTCy8TDDtYv/

Шу билан бирга, Zonda AY икки хил рангда товланиши билан ўзига жалб этади: углерод пластик панеллар бинафша рангида, аммо айрим жойлари шаффоф ҳимоя лаки билан қопланган. Экстерьерининг айрим қисмлари, шунингдек, ғилдираклари ва салон «акцентлари» ҳам бинафшаранг. Машина техника жиҳатдан ўзгаришга учраган-учрамагани номаълум. Тахминларга кўра, Zonda AY двигатели 760 от кучини тақдим этишга қодир.

Таъкидланишича, бу каби саноқли суперкарлар коллексионерлар орасида машҳурликка эришади. Масалан, 2019 йилда Абу-Дабида ўтказилган Sotheby’s аукционида ноёб Pagani Zonda Aether сотилган эди. 2017 йилда ушбу машина учун номаълум харидор 6,8 миллион доллардан ортиқ пул тўлаган.

Аввалроқ McLaren F1 модели 2021 йилнинг энг қиммат автомобилига айлангани, у аукцион орқали 20 миллион доллардан қимматроққа сотилгани тўғрисида хабар берилганди.