Шавкат Мирзиёев Бектемир туманида давлат ташкилотлари ва жамоатчилик вакиллари билан бирга янги боққа кўчат экди. Бу ҳақда Президент матбуот хизмати хабар берди.
“Атроф-муҳитни асраш ва яшил иқтисодиёт йилида кўчат экиб, яшиллик яратиш кўлами кенгайди. Тошкент шаҳрининг Бектемир туманида яна бир боғга асос солинди.
“Ийкота”, “Мажнунтол”, “Зилола”, “Роҳат” ва “Иқбол” маҳаллалари орасидаги бу ҳудуд аввал қаровсиз жой эди. Элнинг бирлиги билан яна бир яшил макон, аҳоли ҳордиқ чиқарадиган парк пайдо бўлмоқда. Уч гектарлик ҳудудга ўрмон концепцияси асосида уч минг туп дарахт ва бута кўчатлари экилди. Уларнинг суғорилиши ва парваришига масъуллар бириктирилди.
Маҳалла фаоллари, нуронийлар ва ёшлар билан самимий мулоқот бўлди. Давлат раҳбари жамоатчилик вакилларига ушбу хайрли ташаббусга ҳисса қўшаётгани учун миннатдорлик билдирди. Барчани кириб келаётган Наврўз байрами билан табриклади.
Президент фармойиши билан эълон қилинган долзарб бир ойлик доирасида маҳаллаларда деҳқончилик ва ободонлаштириш ишлари сафарбарлик билан олиб борилмоқда.
Баҳорда 125 миллион туп кўчат экилиши мўлжалланган. Бунда экин жойларини тўғри танлаш, суғоришни яхшилашга алоҳида эътибор қаратилмоқда. Янги боғда экилган кўчатлар ана шу эзгу амалнинг давоми бўлди.
“Атроф-муҳитни асраш ва яшил иқтисодиёт йили давлат дастурига мувофиқ, бу йил кўчатчиликка ихтисослашган 18 та ўрмон хўжалиги ташкил қилинади. Уларда “илм-лойиҳа-амалиёт” тамойили асосида генетик селексия ишлари кучайтирилиб, плантациялар кенгайтирилади. “Яшил олам” платформаси ишга туширилиб, кўчатларни онлайн сотиб олиш йўлга қўйилади.
Изоҳ (0)