Швейцария федерал прокурори томонидан 29 ноябрь куни тақдим этилган айблов хулосасида мамлакатнинг энг нуфузли банкларидан бири — Lombard Odier Ўзбекистоннинг марҳум президенти Ислом Каримовнинг тўнғич қизи Гулнора Каримованинг гумон қилинаётган жиноий фаолиятини йиллар давомида яширишда ҳал қилувчи рол ўйнагани айтилади, деб ёзади Financial Times нашри.
Прокурорларга кўра, Гулнора Каримова Ўзбекистон ҳукуматининг даромадли шартномаларини назорат қилиб, миллиардлаб долларларни ўзлаштирган ва товламачилик қилган. Шунингдек, даромадларни Швейцарияда жойлашган Тhе Office ташкилоти орқали ювган.
Швейцария прокуратураси 2023 йилда ҳам Гулнора Каримовага айбловлар эълон қилган эди. Уларга кўра Каримова асосан, Ўзбекистонда шартномалар тузиш ниятида бўлган халқаро компаниялардан мунтазам равишда пора олиш орқали миллиардлаб даромадни ўзлаштирган. Прокуратура эълон қилган янги айбловга кўра, Lombard Odier банки жиноий даромадларни легаллаштиришга қарши кураш стандартлари ва ички мувофиқлик тартиб-қоидаларига риоя қилмаганликда айбланмоқда.
Lombard Odier банки ўз баёнотида собиқ мижози, яъни Каримова ҳақида ўн йилдан кўпроқ вақт олдин Швейцариянинг пул ювишга қарши кураш идораларига мустақил равишда хабар берганидан кейин тергов бошланганини таъкидлаган.
“Биз прокурорнинг банкка нисбатан айбловларини эътиборга олдик. Банк учун айбловлар асоссиз. Банк ўзини ҳимоя қилишни режалаштирмоқда. Жараён 2012 йилдан бери давом этмоқда ва банк ҳар доим тегишли органлар билан тўлиқ ҳамкорлик қилиб келган”, дейилади баёнотда.
Мазкур банк 2016 йилда ушбу иш юзасидан жиноий жавобгарликка тортилган. Полиция ўша йили Каримова номига очилган сейфларни тинтув қилганида Ўзбекистон ҳукумати маблағлари ҳисобига олинган қимматбаҳо заргарлик буюмлари ҳамда кўплаб ҳужжатлар топилган, прокурорлар улардан терговда фойдаланган.
Қайд қилинишича, Lombard Odier банкининг собиқ ходимига ҳам прокуратура айблов қўйган. Швейцария қонунчилигига кўра, судгача бу шахснинг исми-шарифи ошкор этилмайди. 2008 йилда Lombard Odier томонидан ишга олинишидан олдин мазкур шахс Каримованинг қўлида ишлагани таъкидланган.
Прокурорлар уни банкнинг ички мувофиқлик талабларини бузишда гумон қилмоқда.
Каримова шунингдек, Швейцариядаги иккинчи йирик банкротлик ишига ҳам алоқадорлиги айтилмоқда. 2010 йилда фақат Ўзбекистонга сармоя киритган ва Зуг шаҳрида жойлашган Zeromax конгломерати 4,6 миллиард доллар қарз билан инқирозга учраган эди. Кредиторлар Каримова ундан жиноий даромад орттириш мақсадида фойдаланганини даъво қилган.
Изоҳ (1)
Shveyrsariya degan davlat borakanmi