Ижтимоий тармоқларда Тошкент шаҳридаги Сергели автомобиль бозорида автомобилларга бўлган талаб кескин камайгани, нархлар тушгани айтилган видеолар тарқалган эди. Мазкур видеоларда нафақат Сергели машина бозоридаги, Ўзбекистондаги барча автомобиль бозорларидаги ҳолат хусусида сўз борганди. “Дарё” мухбири ҳолатга аниқлик киритиш мақсадида Сергели машина бозорида бўлиб, анча йиллардан бери машина олди-сотдиси билан шуғулланаётган ҳамда бозорга машина харид қилиш ниятида тушган харидорларга микрофон тутди.
Зўр тушди, тушганда ҳам тепадан пастга қулади. Бир-икки йил ёки уч йил аввал 7 минг долларга сотилган Matiz’лар ҳозирги пайтда 5-6 минг долларга зўрға сотиляпти. Лекин савдо йўқ. Ҳозир 2-3 минг доллар орасидаги Matiz’лар кўпроқ кетяпти, дейди суҳбатдошлардан бири.
Асосан Cobalt автомобили олди-сотдиси билан шуғулланувчи суҳбатдошнинг айтишича, бозорда барча русумдаги автомобиллар нархи тушган.
Ҳозир ҳамма машиналар нархи тушган. Тушмади десак, хато бўлади. Лекин Cobalt’да кўп “ташлаб кетмаган”. 1000-800 доллар эмас, 300-400 доллар фарқ қилиб турибди, дейди у.
Spark олди-сотдиси билан шуғулланувчи сотувчининг айтишича, ҳолати яхши Spark’ларга ҳозир ҳам талаб кўп.
Энди олдинги нархлар анча “қайтган”. Лекин яхши машина барибир қиммат. Spark’ка талаб яхши, савдоси бўлиб турибди. Тошкент шаҳрида ҳам юришга, ишларни битиришга енгил, қулай машина, харажати кам. Шунинг учунми хоҳловчилар кўп. Эрталабдан 5750 долларга битта машина сотдик. Ярим йил — бир йил орасида минг доллар, 1,5 минг долларга нарх тушди. Мисол учун Gentra’лар 19-20 минг доллардан 12-13 минг долларга пастлаган бўлса, Spark’ларда минг долларгача пастлаш бор, дейди сотувчи.
Gentra автомобили олди-сотдиси билан шуғулланувчи бир суҳбатдош мазкур русумдаги машиналар нархи тушганини, савдоси йўқлигини айтса, бошқаси айнан Gentra’га талаб ҳозир ҳам борлигини, 2022 йилда ишлаб чиқарилган шу русумдаги машинасини 13900 доллар баҳолаётганини, 12000 доллар нақд тўловга бермаётганини таъкидлади.
Matiz’га олдингидек талаб йўқ. Икки-уч йил аввал талаб зўр эди. Кўпчилик Spark ёки ундан кейин ишлаб чиқарилган автомобилларга қизиқяпти, дейди у.
Яна бир суҳбатдош эса автомобиль харидорларининг GM автомобилларига бўлган эҳтиёжи қонганини, энди одамлар хорижда ишлаб чиқарилган машиналарга қизиқаётганини айтмоқда.
Matiz’ларнинг нархи тушди, Spark’ларнинг нархи тушди деганда, одамлар шу машиналардан тўйганини тушуниш мумкин. Одамлар “Иномарка”га ўтяпти. Kia ҳайдаяпти, Hyundai ҳайдаяпти, Toyota ҳайдаяпти. Қачонгача Chevrolet, қачонгача Spark, қачонгача Gentra? Энди “Иномарка” миниши керак. Бизларда ҳам одамлар “Иномарка”ларда юришсин. Бизлар шунинг тарафдоримиз, дейди суҳбатдош.
Яна бир сотувчи машина бозорида нархлар тушмаганини, сотаман деган машинаси тушганини, оламан дегани қиммат эканини айтмоқда.
Сотаман десангиз арзон, оламан десангиз қиммат. Бозор шунақа-да, дейди у.
Бозордаги савдогарларнинг айтишича, Malibu нархи тушган.
Malibu 25 минг доллар эди. Ҳозир 18-17 минг долларга ҳам яхши ҳолатдагисини оласиз. Бу дегани айнан шу русумдаги машина 7 минг долларгача тушди дегани. Лекин Prado’да унақа нарса бўлгани йўқ. Икки-уч минг тушгандир, лекин унақа беш минг, ўн минг тушиб кетмади, дейди сотувчи.
Изоҳ (0)