Тошкент шаҳрининг Яшнобод туманида Gentra автомобили устига дарахт қулаб тушгани, жароҳат олганлар йўқлиги, ҳолат бартараф этилгани хабар қилинганди. Шундан сўнг нафақат мулк эгаси, кўпчиликда автомобиль зарарини ким қоплайди, деган савол туғилди. “Дарё” бунга аниқлик киритди.
“Ўзагросуғурта” АЖ Бошқаруви Суғурта даволари департаменти директори ўринбосари Музаффар Ибрагимовнинг “Дарё”га билдиришича, бу ҳолатда ҳайдовчи ўз автомобилини ихтиёрий суғурта қилдирган бўлса, бу унинг зарарни қоплатишдаги устунлиги ҳисобланади.
Бундай ҳолатда зарар етган автомобилнинг суғурта қилинган ҳолатига аниқлик киритиш лозим бўлади. Одатда автомобиллар икки хил ҳолатда: мажбурий ва ихтиёрий тарзда суғурталанади. Агар автомобиль мажбурий суғурта қилинган бўлса, аниқроғи, фақат ЙПХ ходими талаб қилувчи 40 минг сўмдан 168 минг сўмгача (Тошкент шаҳри ва бошқа ҳудудлар учун) бўлган миқдордаги суғурта полисига эга бўлса, зарарланган автомобиль эгасининг мулкига етказилган зарар қопланмайди. Автомобиль ихтиёрий суғурталанган бўлса, дейлик, кредитга олинган автомобиль ёки гаровга қўйилган машина бўлса ёки ҳайдовчи ўз ихтиёри билан мулкини суғурталаб қўйган бўлса, шартномада кўрсатилган талабга қараб дарахт босиб қолган автомобилларнинг зарари тўлиқ миқдорда юз фоиз тўлаб берилади, — дейди “Ўзагросуғурта” АЖ бошқаруви Суғурта даъволари департаменти директори ўринбосари Музаффар Ибрагимов.
Масъулнинг тушунтиришича, агар суғурта компанияси, дейлик, 14 март куни дарахт босиб қолган Gentra автомобили ихтиёрий суғурталанган бўлса ва машина тиклаб бўлмайдиган ҳолатга келди, деган хулоса бўлса, тузилган шартнома бандларига кўра автомобиль бозор нархининг 85 фоизидан 100 фоизгача бўлган нархини тўлаб беради.
“Суғурта компанияси ва мулкини ихтиёрий суғурталовчи шахс ўртасида тузилган шартномада барча шартлар белгилаб қўйилган бўлади. Шартномада мажақланган автомобиль тиклаб бўлмайдиган даражага келиб қолганда ва мулк эгаси мазкур транспорт воситасидан воз кечса, унинг зарари суғурта компанияси томонидан тўлиқ тўлаб берилиши ҳамда зарар етган машина суғурта компанияси ихтиёрига ўтишини назарда тутган банд суғурта шартномасида кўрсатилиши мумкин”, — дейди компания вакили.
Мажбурий суғурталанган автомобилнинг 40 миллион сўмгача бўлган суғурта пули суғурталанган автомобилдан зарар кўрган жабрланувчиларга тўлаб берилади.
“Устига дарахт қулаб тушиши оқибатида мажақланган Gentraъда ихтиёрий суғурта бўлмай, мажбурий суғуртагина бўлса, машинаси зарарини суғурта компанияси қоплаш мажбуриятини олмайди, балки мулк эгасининг жабрланувчига етказган зарарини суғурта компанияси орқали тўлаб беради. Бунда умумий сумма 40 миллион сўм бўлиб, шу пулнинг 35 фоизи, яъни 14 миллион сўмгача бўлган қисми жабрланувчи томоннинг мулкига етказилган зарарни қоплаш учун, қолган 65 фоизи — 26 миллион сўми жабрланган шахснинг ҳаёти-соғлиғини тиклаш учун тўлаб берилади”, — дейди мутахассис.
Экология, атроф-муҳитни муҳофаза қилиш ва иқлим ўзгариши вазирлиги бош мутахассиси Мурод Нурматовнинг “Дарё”га қўшимча қилишича, жамоат жойларидаги, катта кўча юзидаги кўп йиллик дарахтларнинг бехосдан қулаб тушишининг олдини олиш мақсадида вазирлик ҳамда жойлардаги Ободонлаштириш бошқармалари ҳамкорлигида ўрганишлар олиб борилади.
Ободонлаштириш бошқармаси ходимларининг кузатувларидан келиб чиқиб, хавфли кўринишга эга бўлган, қулаб тушиш хавфи юқори бўлган дарахтлар ҳақида вазирлик ва унинг жойлардаги бошқармаларига хабар берилади ҳамда вазият назоратга олинади. Бироқ ҳаддан ташқари кўп ёмғир ёғиб, ернинг бўшашиб қолиши ёки қалин қор ёғиши оқибатида дарахтнинг қулаб тушиши билан боғлиқ ҳолатларни олдиндан билиб бўлмайди. Соғлом дарахт ҳам кучли шамол ёки кўп қор ёғиши оқибатида қулаб тушиши мумкин. Бунга кафолат йўқ. Шу сабаб ҳам кучли шамол кузатиладиган бўлса, жойлардаги ҳокимликлар ҳайдовчиларни огоҳлантириб, автомобилларини дарахтлар остида қолдирмасликни тавсия қилиб боради, — дейди Мурод Нурматов.
Тошкентда дарахт остида қолиб, мажақланган автомобилнинг айнан қайси суғурта компаниясида суғурталангани таҳририятга номаълум. “Ўзагросуғурта” вакилларининг саволга жавоб бериши таҳририятнинг айнан шу компания вакилларини танлаши билан боғлиқ. Автомобиль шу компания томонидан суғурталанган экан, деган хулосага келиш нотўғри.
Изоҳ (0)