Ijtimoiy tarmoqlarda Toshkent shahridagi Sergeli avtomobil bozorida avtomobillarga bo‘lgan talab keskin kamaygani, narxlar tushgani aytilgan videolar tarqalgan edi. Mazkur videolarda nafaqat Sergeli mashina bozoridagi, O‘zbekistondagi barcha avtomobil bozorlaridagi holat xususida so‘z borgandi. “Daryo” muxbiri holatga aniqlik kiritish maqsadida Sergeli mashina bozorida bo‘lib, ancha yillardan beri mashina oldi-sotdisi bilan shug‘ullanayotgan hamda bozorga mashina xarid qilish niyatida tushgan xaridorlarga mikrofon tutdi.
Zo‘r tushdi, tushganda ham tepadan pastga quladi. Bir-ikki yil yoki uch yil avval 7 ming dollarga sotilgan Matiz’lar hozirgi paytda 5-6 ming dollarga zo‘rg‘a sotilyapti. Lekin savdo yo‘q. Hozir 2-3 ming dollar orasidagi Matiz’lar ko‘proq ketyapti, deydi suhbatdoshlardan biri.
Asosan Cobalt avtomobili oldi-sotdisi bilan shug‘ullanuvchi suhbatdoshning aytishicha, bozorda barcha rusumdagi avtomobillar narxi tushgan.
Hozir hamma mashinalar narxi tushgan. Tushmadi desak, xato bo‘ladi. Lekin Cobalt’da ko‘p “tashlab ketmagan”. 1000-800 dollar emas, 300-400 dollar farq qilib turibdi, deydi u.
Spark oldi-sotdisi bilan shug‘ullanuvchi sotuvchining aytishicha, holati yaxshi Spark’larga hozir ham talab ko‘p.
Endi oldingi narxlar ancha “qaytgan”. Lekin yaxshi mashina baribir qimmat. Spark’ka talab yaxshi, savdosi bo‘lib turibdi. Toshkent shahrida ham yurishga, ishlarni bitirishga yengil, qulay mashina, xarajati kam. Shuning uchunmi xohlovchilar ko‘p. Ertalabdan 5750 dollarga bitta mashina sotdik. Yarim yil — bir yil orasida ming dollar, 1,5 ming dollarga narx tushdi. Misol uchun Gentra’lar 19-20 ming dollardan 12-13 ming dollarga pastlagan bo‘lsa, Spark’larda ming dollargacha pastlash bor, deydi sotuvchi.
Gentra avtomobili oldi-sotdisi bilan shug‘ullanuvchi bir suhbatdosh mazkur rusumdagi mashinalar narxi tushganini, savdosi yo‘qligini aytsa, boshqasi aynan Gentra’ga talab hozir ham borligini, 2022-yilda ishlab chiqarilgan shu rusumdagi mashinasini 13900 dollar baholayotganini, 12000 dollar naqd to‘lovga bermayotganini taʼkidladi.
Matiz’ga oldingidek talab yo‘q. Ikki-uch yil avval talab zo‘r edi. Ko‘pchilik Spark yoki undan keyin ishlab chiqarilgan avtomobillarga qiziqyapti, deydi u.
Yana bir suhbatdosh esa avtomobil xaridorlarining GM avtomobillariga bo‘lgan ehtiyoji qonganini, endi odamlar xorijda ishlab chiqarilgan mashinalarga qiziqayotganini aytmoqda.
Matiz’larning narxi tushdi, Spark’larning narxi tushdi deganda, odamlar shu mashinalardan to‘yganini tushunish mumkin. Odamlar “Inomarka”ga o‘tyapti. Kia haydayapti, Hyundai haydayapti, Toyota haydayapti. Qachongacha Chevrolet, qachongacha Spark, qachongacha Gentra? Endi “Inomarka” minishi kerak. Bizlarda ham odamlar “Inomarka”larda yurishsin. Bizlar shuning tarafdorimiz, deydi suhbatdosh.
Yana bir sotuvchi mashina bozorida narxlar tushmaganini, sotaman degan mashinasi tushganini, olaman degani qimmat ekanini aytmoqda.
Sotaman desangiz arzon, olaman desangiz qimmat. Bozor shunaqa-da, deydi u.
Bozordagi savdogarlarning aytishicha, Malibu narxi tushgan.
Malibu 25 ming dollar edi. Hozir 18-17 ming dollarga ham yaxshi holatdagisini olasiz. Bu degani aynan shu rusumdagi mashina 7 ming dollargacha tushdi degani. Lekin Prado’da unaqa narsa bo‘lgani yo‘q. Ikki-uch ming tushgandir, lekin unaqa besh ming, o‘n ming tushib ketmadi, deydi sotuvchi.
Izoh (0)