Мадриднинг “Реал” клуби ёш иқтидорлар Арда Гюлер ва Эндрикни кўпроқ ўйин амалиётига эга бўлиши учун Бундеслига клубларига ижарага бериш вариантини кўриб чиқмоқда. Бу ҳақида Sport Bild нашри хабар бермоқда.
Мадридликлар ушбу футболчилар “Реал”да кам ўйнаётганидан хавотирда ва уларнинг ривожланиш жараёнини тезлаштиришни хоҳламоқда. Жорий мавсумда Гюлер ва Эндрик бош мураббий Карло Анчелотти қўл остида кам ўйин амалиётига эга бўлишмоқда. Туркиялик ярим ҳимоячи Евро-2024 даги ёрқин иштирокидан сўнг “Реал” таркибида муҳим рол ўйнаши кутилган эди, бироқ ҳозиргача барча турнирларда 1000 дақиқадан кам вақтни майдонда ўтказди. Эндрик “Реал” сафида 6 гол урган, аммо Килиан Мбаппе, Винисиус Жуниор, Родриго ва Браим Диас билан рақобатда имкониятни бой бермоқда.
Манбага кўра, “Лейпциг” Гюлер ва Эндрикни ижарага олиш ниятида. “Айнтрахт” эса фақатгина туркиялик футболчига қизиқиш билдирмоқда. Бироқ “Реал” уларни фақат 2025/26 йилги Чемпионлар Лигасида қатнашадиган жамоаларга ижарага беришга тайёр, чунки бу футболчиларга юқори савиядаги ўйинларда тажриба орттириш имкониятини яратади деб ҳисобламоқда.
Изоҳ (0)