Янгиҳаёт тумани ҳокими ўринбосари, туман оила ва хотин-қизлар бўлими бошлиғи Ирода Абдуллаева туманда фоҳишаликка қарши кураш ҳақида гапириб, янги қурилаётган кўп қаватли уйлардаги ижарага берилган хонадонлар доимий назоратда эканини айтди. Бу ҳақда у туман ҳокимлигида ташкил этилган матбуот анжуманида гапирди.
Тўғри, бу жуда ҳам оғриқли ҳолат ва бу сўзнинг ўзини айтишга ҳатто мен озгина қийналяпман. Бу масалада аёл қаердан бўлишидан қатъи назар, ёрдам бериш ва кўмаклашишимиз керак деб ўйлайман. Уни тўғри йўлга бошлашга ундашимиз керак. Чунки агар биз Янгиҳаёт туманида мана шу ишларни қилиш учун шароит яратиб берган бўлсак, бу бизнинг айбимиз бўлади. Шунинг учун, аёл қаердан бўлишидан қатъи назар, у бизнинг Тошкент шаҳрида яшаётган бўлса ҳам, фарқи йўқ. Агар биз унга имконият яратиб, уни бу йўлга чорласак, бу бизнинг хатомиз бўлади, деди туман оила ва хотин-қизлар бўлими бошлиғи Ирода Абдуллаева.
Масъулнинг айтишича, тумандаги кўп қаватли уйлар, жумладан, янги қурилган кўп қаватли уйлардаги ижарага берилган хонадонлар доимо назорат қилиб борилади.
Маҳаллаларимизда бу йўналишда жуда катта тизим йўлга қўйилган. Яъни, ижарага бериладиган хонадонлар назоратда бўлади ва доимий равишда кузатилади. Чунки ҳар бир маҳалламиз шахмат тарзида тузилган, яъни, доимий яшайдиган аҳолимиз билан алоқа қилиб турилади. Бизда кўплаб уйлар қурилаётганлиги учун келиб кетувчилар кўп. Кириб чиқишимиз жуда ҳам кўп, бозор яқинлиги сабабли, масалан, ипподром, бозорчилар ҳам харид қилиш учун келишади. Биз шароит яратиб бермаслигимиз керак, дейди у.
Тошкент шаҳар ИИББ 2024 йилнинг апрель ойида ўша йилнинг дастлабки уч ойдида фоҳишалик билан шуғулланганлар ҳақида ахборот бериб, Тошкентда фоҳишалик билан шуғулланган 1068 нафар шахснинг 92,8 фоизи яъни 992 нафари вилоятлардан келиб, бу турдаги ҳуқуқбузарликни содир этган аёллар эканига урғу берганди.
Изоҳ (0)