Адлия вазири буйруғи билан Ўзбекистонда нотариуслар томонидан амалга ошириладиган ҳуқуқий ва техник тусдаги қўшимча ҳаракатлар учун ундириладиган тўловларнинг максимал миқдорларига ўзгартиришлар киритилди.
Мазкур буйруқ Рақобатни ривожлантириш ва истеъмолчилар ҳуқуқларини ҳимоя қилиш қўмитаси билан келишилган бўлиб, у 2025 йил 1 мартдан кучга киради.
Хусусан, қуйидаги хизматлар учун комиссия тўловлари миқдори оширилди:
кўчмас мулк ва автотранспорт воситаларини бошқа шахсга ўтказиш бўйича маслаҳат бериш, шунингдек, ипотека ва лизинг шартномаларини тасдиқлаш — БҲМнинг 10 фоизидан 15 фоизигача;
нотариал тасдиқланган шартномаларни тайёрлаш:
- кўчмас мулкни ўтказиш бўйича – БҲМнинг 20 фоизидан 30 фоизигача;
- гаров (ипотека) ва лизинг (жисмоний шахслар учун ёки бир томони жисмоний шахс бўлса) — БҲМнинг 15 фоизидан 25 фоизигача.
Нотариуслар томонидан бажариладиган қўшимча юридик ва техник ҳаракатлар учун ундириладиган бошқа комиссия тўловлари миқдорларини қуйидаги ҳавола орқали кўриб чиқиш мумкин.
Нотариуслар томонидан амалга ошириладиган ҳуқуқий ва техник тусдаги қўшимча ҳаракатлар учун ундириладиган тўловларнинг максимал миқдорларида белгиланган ҳақ миқдоридан ортиқ ундирилишига йўл қўйилмайди. Бунда тўловлар хусусий амалиёт билан шуғулланувчи нотариуслар томонидан белгиланганидан кам миқдорда ундирилиши мумкин.
2024 йил июлидан Ўзбекистонда нотариал идорага бормасдан амалга ошириладиган нотариал ҳаракат турлари кўпайди. Эр ва хотиннинг умумий мол-мулкни, шу жумладан, кўчмас мулкни тасарруф этиш бўйича битим тузиш учун хотин (эр)нинг розилик аризасини, автомототранспорт воситасини тасарруф этиш (сотиш, ҳадя, қилиш, айирбошлаш, гаровга қўйиш ва бошқа турдаги тасарруф қилиш) ишончномасини, ҳужжатларнинг бир тилдан бошқа тилга тўғри таржима қилинганлигини шаҳодатлашни видеоконференция орқали (онлайн) нотариал расмийлаштириш мумкин.
“Э-нотариус.уз” ахборот портали орқали нотариал ҳаракатларни дунёнинг исталган жойидан туриб туриб расмийлаштирса бўлади.
Изоҳ (0)