“Вазирлар Маҳкамасининг Нотариуслар томонидан айрим нотариал ҳаракатларни амалга ошириш тартиби тўғрисидаги маъмурий регламентларни тасдиқлаш ҳақида” қарорига ўзгартириш ва қўшимчалар киритиш тўғрисидаги ҳукумат қарори қабул қилинди.
Нотариал ҳаракатларни амалга оширишда нотариуслар томонидан “Нотариус” автоматлаштирилган ахборот тизими орқали электрон шаклда олинган малумотларни чоп этиш ва ҳужжатлар йиғмажилдига тикиш талаби бекор қилинмоқда. Ушбу маълумотлар эндиликда тизимда сақланади.
Шу кунга қадар нотариуслар қуйидаги ҳужжатларни чоп этиб йиғмажилдга тикишга мажбур бўлишган:
- юридик шахснинг таъсис ҳужжатлари ва давлат рўйхатидан ўтганлиги ҳақида гувоҳнома;
- тўлов амалга оширилганлиги ҳақида инвойс;
- жисмоний шахсга вакиллик қилиш учун ишончнома берган шахснинг ўлим ҳақида далолатнома ёзуви қайд этилмаганлиги тўғрисида маълумотнома;
- мулкни бошқа шахсга ўтказиш тақиқланмаганлиги ёки хатланмаганлиги ҳақидаги маълумотнома ва бошқалар.
2024 йил 1 январдан бошлаб кўп квартирали уйлардаги кўчмас мулкни бошқа шахсга ўтказиш билан боғлиқ битимларни тасдиқлашда нотариуслар мулкдорнинг мажбурий бадаллар ёки тўловлар бўйича қарздорлиги мавжуд эмаслигини Қурилиш ва уй-жой коммунал хўжалиги вазирлигининг ахборот тизими орқали текширишади.
Ҳужжат қонун ҳужжатлари маълумотлари миллий базасида эълон қилинган ва 2023 йил 13 декабрдан кучга кирди.
Бундан олдин Ўзбекистонда мол-мулк билан боғлиқ айрим битимларни видеоконференсалоқа орқали расмийлаштиришга рухсат берилиши, нотариуслар томонидан ундириладиган тўловларнинг миқдори ўзгартирилши маълум бўлганди.
Изоҳ (0)