Adliya vaziri buyrug‘i bilan O‘zbekistonda notariuslar tomonidan amalga oshiriladigan huquqiy va texnik tusdagi qo‘shimcha harakatlar uchun undiriladigan to‘lovlarning maksimal miqdorlariga o‘zgartirishlar kiritildi.
Mazkur buyruq Raqobatni rivojlantirish va iste’molchilar huquqlarini himoya qilish qo‘mitasi bilan kelishilgan bo‘lib, u 2025-yil 1-martdan kuchga kiradi.
Xususan, quyidagi xizmatlar uchun komissiya to‘lovlari miqdori oshirildi:
ko‘chmas mulk va avtotransport vositalarini boshqa shaxsga o‘tkazish bo‘yicha maslahat berish, shuningdek, ipoteka va lizing shartnomalarini tasdiqlash — BHMning 10 foizidan 15 foizigacha;
notarial tasdiqlangan shartnomalarni tayyorlash:
- ko‘chmas mulkni o‘tkazish bo‘yicha – BHMning 20 foizidan 30 foizigacha;
- garov (ipoteka) va lizing (jismoniy shaxslar uchun yoki bir tomoni jismoniy shaxs bo‘lsa) — BHMning 15 foizidan 25 foizigacha.
Notariuslar tomonidan bajariladigan qo‘shimcha yuridik va texnik harakatlar uchun undiriladigan boshqa komissiya to‘lovlari miqdorlarini quyidagi havola orqali ko‘rib chiqish mumkin.
Notariuslar tomonidan amalga oshiriladigan huquqiy va texnik tusdagi qo‘shimcha harakatlar uchun undiriladigan to‘lovlarning maksimal miqdorlarida belgilangan haq miqdoridan ortiq undirilishiga yo‘l qo‘yilmaydi. Bunda to‘lovlar xususiy amaliyot bilan shug‘ullanuvchi notariuslar tomonidan belgilanganidan kam miqdorda undirilishi mumkin.
2024-yil iyulidan O‘zbekistonda notarial idoraga bormasdan amalga oshiriladigan notarial harakat turlari ko‘paydi. Er va xotinning umumiy mol-mulkni, shu jumladan, ko‘chmas mulkni tasarruf etish bo‘yicha bitim tuzish uchun xotin (er)ning rozilik arizasini, avtomototransport vositasini tasarruf etish (sotish, hadya, qilish, ayirboshlash, garovga qo‘yish va boshqa turdagi tasarruf qilish) ishonchnomasini, hujjatlarning bir tildan boshqa tilga to‘g‘ri tarjima qilinganligini shahodatlashni videokonferensiya orqali (onlayn) notarial rasmiylashtirish mumkin.
“E-notarius.uz” axborot portali orqali notarial harakatlarni dunyoning istalgan joyidan turib turib rasmiylashtirsa bo‘ladi.
Izoh (0)