G‘ulomjon Yoqubovni boshqa san’atkorlardan ajratib turadigan jihati — tashqi ko‘rinishiga alohida urg‘u qaratishida. Xalq artisti to‘y-hasham va konsertlarda tashqi ko‘rinishi va nutqiga o‘zgacha e’tibor beradi. U omma oldida o‘zini tutishni bilmaydigan, to‘y va tadbirlarga mayka va shortikda keladigan qo‘shiqchilar haqida gapirdi.
— Ba’zi qo‘shiqchilar to‘yga, xalq xizmatiga borganda “tapochka” yoki krossovkada boradi, maykada ham borganlarini ko‘rganman. Odamlar 20-30 yilda bir marta to‘y qiladi, bor chiroyli kiyimini o‘sha kuni kiyishga harakat qiladi. Mehmonlar ham falonchining to‘yi ekan deb yaxshi kiyimlar sotib oladi. Hayit bayramiga tayyorlangandek necha yilda bir bo‘ladigan to‘yga ham tayyorlanib borishadi. Nimaga endi artistlar oddiy kiyim yoki maykada kirib keladi? Bu odamlarning g‘ashiga tegadi. Balki bu narsa yoshlarga yoqar, lekin yoshi sal kattaroqlarga yoqmaydi. Mana buni ahvolini qara deyishadi. Sahnaga ko‘chadagi kiyim bilan kirib bo‘lmaydi, sahna muqaddas joy. Hindlar sahnani bir o‘pib, keyin qadam bosgan.
Men ko‘chada kiygan kiyimimni hech kim hech qachon sahnada ko‘rmagan. Men har yili, albatta, yangi kostyum kiyishim shart. Qo‘shiqqa mos kiyimni chet eldan bo‘lsa ham qidirib topib, bo‘lmasa shu yerda tiktirib kiyaman, xalqqa ko‘rsataman. Eshakka to‘qim, odamga libos, deb bekorga aytilmagan.
San’atkor suhbatda ham, yeb-ichishda ham, kiyinishda ham o‘rnak bo‘lishi kerak. To‘g‘ri, hech kimni majburlay olmaymiz, ammo yoshlarga iltimosim shu. Mendan ko‘rib 10-15 yildan beri yaxshi kiyinib chiqayotganlar ham bor, mana shularga rahmat, deydi xalq artisti.
- Avvalroq G‘ulomjon Yoqubov qo‘shiqchi nabirasi, 25 yildan buyon konsert berishi, qo‘shiq talashish ongsiz odamlarning ishi ekani va uni o‘ldi deya yolg‘on xabar tarqatganlar haqida “Daryo”ga bergan intervyusidan parcha e’lon qilingan edi.
Izoh (0)