Сенаторлар Самарқанд вилоятининг қатор туман ва шаҳарлари чегараларини ўзгартиришга розилик билдирди, деб хабар бермоқда парламент юқори палатаси матбуот хизмати.
22 февралдаги ялпи мажлисда парламент юқори палатаси аъзолари томонидан Самарқанд вилоятининг Самарқанд шаҳри, Самарқанд ва Оқдарё туманлари чегараларини ўзгартириш тўғрисидаги масала қизғин муҳокама қилинди ва муҳокама сўнггида Сенатнинг тегишли қарори қабул қилинди.
Мажлисда ушбу ўзгаришларни амалга ошириш аҳолига муносиб яшаш шароитини яратиш, бунинг учун тегишли манзилларда муҳандислик-коммуникация тизимларини, шунингдек ижтимоий соҳа (мактаб, боғча, касалхона) объектларини барпо этиш, янги иш ўринларини яратишда муҳим аҳамиятга эга эканлиги қайд этилди.
2023 йил 20 июлда Президентнинг “Самарқанд шаҳрида “Ширин” замонавий ишбилармонлик маркази ва турар жойлар комплексини барпо этиш чора-тадбирлари тўғрисида”ги қарори қабул қилинган эди. Муҳокама қилинган масала ҳам айнан Самарқанд вилоятининг ўзига хос хусусиятларини инобатга олган ҳолда давлат раҳбари томонидан қабул қилинган қарорнинг тўлиқ рўёбга чиқарилишида муҳим омили сифатида хизмат қилади.
Хусусан, аҳолининг уй-жой билан таъминлаш бўйича таклифларидан келиб чиқиб, фуқаролар учун қулай бўлган Самарқанд шаҳридан ўтган Зарафшон дарёси қирғоғи бўйлаб 15 километр узунликдаги масофада қиймати 10 миллиард долларлик “Ширин” замонавий ишбилармонлик маркази ва турар жойлар комплексини барпо этиш мақсад қилинган.
Сенаторлар кўриб чиққан масалада Самарқанд вилояти Оқдарё туманидан 243 гектар, Самарқанд туманидан 170 гектар, жами 413 гектар ер майдони Самарқанд шаҳри таркибига ўтказилиши назарда тутилмоқда. Натижада амалдаги 252 гектардан иборат “Ширин” мавзеси ҳудуди кенгайтирилиб, жами 665 гектар майдонни ташкил этади.
Муҳокамалар жараёнида тасдиқланган мастер режа бўйича ҳудудда 180 минг аҳолига мўлжалланган жами 60 мингта хонадондан иборат 254 та кўп қаватли уйлар, 45 та ижтимоий соҳа объекти қурилиши маълум қилинди. Мазкур “Ширин” шаҳарчасида бунёдкорлик лойиҳаларини амалга ошириш муддатлари аниқ режалаштирилган ва қурилиш ишлари 3 та босқичда олиб борилади. “Ширин” замонавий ишбилармонлик маркази тўлиқ барпо этилиши натижасида турли соҳаларда 50 мингга яқин аҳоли учун янги иш ўринлари яратилади.
Бундан ташқари, ҳудудда 112 километр ички йўллар, пиёдалар ва велосипед йўлаклари, 6 километр ерусти метро йўли, 2 та катта кўприк ҳамда 7,2 километр ички коммуникация учун туннел, 180 километр ирригация қувури ҳамда 14 километр канал ва кўплаб суғориш иншоотлари қурилиши режалаштирилган.
Сенаторларнинг фикрига кўра, вилоятдаги чегараларнинг ўзгартирилиши Самарқанд шаҳрининг меъморий қиёфасини яхшилаш ва ободонлаштириш, хорижий ва маҳаллий инвесторлар учун жозибадорлигини ошириш, шаҳарнинг туризм салоҳиятидан самарали фойдаланиш, замонавий бизнес, молиявий ва туристик инфратузилмаларни жадал ривожлантиришни таъминлаш ва энг асосийси аҳолининг турмуш фаровонлигини оширишга хизмат қилади.
Изоҳ (0)