“Ҳудудгазтаъминот” 12 декабрь куни республика ҳудуди бўйлаб газ таъминотида юзага келган авариялар бўйича маълумот берди.
Булар:
- Навоий вилояти “Шўртепа” МФЙдаги ўрта босимли газ қувурида газ сизиб чиқиши ҳолати аниқланган;
- Жиззах вилоятининг Шароф Рашидов туманидаги “Янги ҳаёт” ГЦда ўрта босимли ер ости газ қувурида газ сизиб чиқиши ҳолати қайд этилган;
- Сирдарё вилоятининг Ховос тумани “Ховособод” МФЙдаги юқори босимли газ қувурида пайванд чоки ёрилиши натижасида газ сизиб чиқиши кузатилган;
- Қашқадарё вилояти Қарши шаҳридаги 6-митти туман ҳудудидаги юқори босимли газ қувурида газ сизиб чиқиш ҳолати кузатилган;
- Андижон вилоятининг Улуғнор тумани “Янгиобод” МФЙдаги юқори босимли газ қувурида авария ҳолати кузатилган;
- Бухоро вилоятининг Вобкент туманида “Қўқин”, “Гулистон”, “Арабхона”, “Шохнигор”, “Ширин”, “Чорбоғкент”, “Паноб” ва “Ҳажувон” МФЙларини табиий газ билан таъминловчи ўрта босимли газ қувурида авария ҳолати кузатилган;
- Бухоро шаҳрининг “Гулчорбоғ” ва “Қалқон” МФЙларини табиий газ билан таъминловчи ўрта босимли газ қувурида носозлик кузатилгани сабаб, 700 истеъмолчига вақтинча газ таъминоти тўхтатилган.
Қайд этилишича, юқоридаги барча ҳолатлар тегишли масъуллар томонидан бартараф этилиб, газ таъминоти тикланган.
Аҳоли истеъмолчиларида узилишларни олдини олиш мақсадида бугун, 13 декабрь куни пойтахт, Самарқанд, Тошкент, Андижон, Наманган ва Фарғона вилоятларидаги АГТКШларнинг фаолиятида қўшимча чекловлар киритилган. Ҳозирги вақтда белгиланган график бўйича 1179 тадан 547 АГТКШ ишламоқда.
“Ҳудудгазтаъминот” АЖ фуқаролардан газ жиҳозларидан фақат бирламчи заруриятлар учун фойдаланишни, уйдан чиқиб кетаётганда имкон қадар иситиш жиҳозларини ўчиришни сўрайди.
Бундан аввал Андижон, Сурхондарё вилоятлари ва Қорақалпоғистондаги метан заправкалар фаолиятига чеклов ўрнатилганди. Биринчи навбатда аҳоли, шифохона, мактаб ҳамда мактабгача таълим ташкилоти каби аҳамиятга эга муассасаларнинг табиий газ таъминоти барқарорлигини таъминлаш мақсад қилинган. 12 декабрдан газ заправкаларнинг иш вақтига ўзгартиришлар киритилиб, соат 06:00 дан 12:00 гача этиб белгиланди.
Изоҳ (0)