Финляндия бош вазири Петтери Орпо Россия билан чегарадаги назорат пунктлари 14 январдан кейин очилмаслигини тасдиқлади. Бу ҳақда у Yle жамоат телерадиокомпаниясига берган интервьюсида айтиб ўтди.
“Менда мавжуд бўлган маълумотларга кўра, Россияда ҳеч нарса ўзгармади. Мен юзага келиши мумкин бўлган таҳдидлар ўша даражада қолаётганига аминман. Бу кейинги ҳаракатлар, яъни чекловлар зарурлигини назарда тутади”, — деди Орпо. Шу билан бирга, у ҳукумат яқин бир неча кун ичида янги қарор қабул қилиши кераклигини маълум қилди.
Бош вазир қарор қабул қилишда чегара ва миллий хавфсизлик билан бирга, Финляндияда яшовчи русларнинг аҳволи ҳам инобатга олинганини таъкидлади. “Ҳукумат чегара хавфсизлиги биз учун муҳим масала деган хулосага келди”, — деди Орпо.
Аввалроқ Финляндия ҳукумати 2023 йил 30 ноябрдан 14 декабргача Россия Федерацияси билан чегарадаги барча автомобиль назорат-ўтказиш пунктларини ёпиш тўғрисида қарор қабул қилган эди.
Иккита назорат-ўтказиш пункти қайта очилган, бироқ учинчи давлатлардан муҳожирларнинг қайта оқими туфайли чегара 2024 йил 14 январгача яна ёпилганди.
Изоҳ (0)