Эстония Россия—Финляндия чегарасида кузатилганидек муҳожирлар оқимидан ҳимояланиш учун Россия билан чегарани ёпишга тайёр. Бу ҳақда Эстония ташқи ишлар вазирлиги раҳбари Маргус Цахкна Брюсселда Шимолий ва Болтиқбўйи мамлакатлари ташқи ишлар вазирларининг йиғилишида маълум қилди.
“Финляндия чегарасида содир бўлаётган воқеалар Россиянинг шафқатсиз гибрид ҳужумидан бошқа нарса эмас”, — деди вазир. “Бундай ҳужумлардан ҳимояланиш учун Эстония Россия билан чегарани ёпишга тайёр”.
Бир ҳафта олдин Эстония чегарачилари Нарва чегара пунктида “аждар тишлари” деб номланувчи бетон блокларни ўрнатишни бошлаганди. Расмийлар миграция вазияти ёмонлашгани сабабли назорат-ўтказиш пункти ёпилишини истисно қилмади.
Нарвадаги назорат пункти икки давлат чегарасидаги энг оммалашгани ҳисобланади. Россия ва Эстония ўртасида жами бешта назорат-ўтказиш пункти мавжуд: “Луҳамаа” ва “Койдула” назорат пунктлари автомобиль қатнови учун, қолган иккитаси эса темирйўл ҳаракати учун мўлжалланган.
Аввалроқ Латвия ҳукумати Россия билан чегарани ёпишни истисно қилмаган эди. Ички ишлар вазирлиги раҳбари Ричард Козловскиснинг сўзларига кўра, бундай қарор “агар вазият тубдан ўзгариб, миллий хавфсизликка таҳдид юзага келса” қабул қилинади. Литва эса Россия билан чегараларини ёпиш учун ҳеч қандай сабаб кўрмаётганини маълум қилди.
Финляндия Яқин Шарқ ва Африкадан Россия ҳудуди орқали мамлакатга ўтишга уринган муҳожирлар оқими туфайли барча чегара пунктларини ёпишга қарор қилди. Охирги назорат пункти бугун ярим тунда ёпилади.
Хелсинкига кўра, Россия томони учинчи давлатлардан келган муҳожирларнинг кўпчилигида чегарадан ўтиш учун ҳужжатлари йўқлигига қарамай, уларга ёрдам бермоқда. Россия Ташқи ишлар вазирлиги бу айбловларни “жуда ғалати” деб атади ва жавоб чораларини кўришга ваъда берди. Кремль Финляндия Россия билан яхши муносабатлардан атай узоқлашишга қарор қилган, деб ҳисоблайди.
Изоҳ (0)