Хитой элчиси Қатарда ҲАМАС сиёсий раҳбарияти билан учрашув ўтказди

Хитой вакили Ванг Кежиан 17 март куни ҲАМАС сиёсий раҳбари Исмоил Ҳания билан Қатарда учрашган. Бу ҳақда CNN нашри хабар берди.

Хабарда айтилишича, Қатарда бўлиб ўтган учрашув чоғида Хитой ва ҲАМАС вакиллари Ғазо можароси ва бошқа халқаро масалалар юзасидан фикр алмашган. Учрашувда ҲАМАС вакили Исмоил Ҳания тажовуз ва қирғинларни тезда тўхтатиш, мустақил Фаластин давлатини барпо этиш бўйича сиёсий мақсадлар ва интилишларга эришиш зарур эканлигини таъкидлаган. Исроил ҳарбийлари Ғазодан чиқиб кетиши муаммога ягона ечим эканини урғулаган.

Ўтган ҳафтада Хитой расмийси Ванг Кежиан оккупация қилинган Ғарбий Соҳилга ҳам ташриф буюрган эди. Элчи у ерда Фаластин ташқи ишлар вазири Риёд ал-Маликий билан учрашиб, музокаралар ўтказган. Учрашувда Хитой расмийси унинг ҳукумати Ғазодаги уруш ва оғир гуманитар вазиятдан “қаттиқ хавотирда” эканлигини, Хитой ўт очишни тўхтатиш ва тинч аҳолини ҳимоя қилиш бўйича қаттиқ иш олиб бораётганини айтган.

Ғарбий Соҳилдан сўнг жаноб Ванг Исроилга ташриф буюриб, Тель-Авивнинг Осиё ва Тинч океани минтақаси бўйича Ташқи ишлар вазирлиги расмийси Ҳагаи Шагрир билан учрашувда бўлган. Элчи Исроил расмийларига тўлиқ ўт очишни тўхтатиш, урушни тўхтатиш, инсонпарварлик ёрдамини кафолатлаш ва тинч аҳолини ҳимоя қилиш устувор вазифа эканини таъкидлаган. Икки давлат ечими борасидаги чақириқларни такрорлаган.

Элчи Ванг Кежиан 7 октябрь воқеаларидан бери Яқин Шарққа ташриф буюраётган илк Хитой расмийсидир. Унинг сафари 10 мартда бошланиб, ҳалигача давом этмоқда.