Ўзбекистонда 17 январдан оғирлиги 100 грамм бўлган олтиндан тайёрланган ўлчовли қуймалар тижорат банклари орқали сотувга чиқарилади. Бу ҳақда Марказий банк матбуот хизмати хабар берди.
Маълум қилинишича, МБ аҳолининг инвестисия ва жамғариш имкониятларини янада ошириш ҳамда қимматбаҳо металлар муомаласини кенгайтириш мақсадида 5, 10, 20, 50 граммли ўлчовли олтин қуймаларга қўшимча равишда ушбу қуймаларни сотувга чиқармоқда.
Қайд этилишича, қуймалар махсус ҳимоя қадоқларида сотув учун тақдим этилади.
Олтин қуймаларнинг қадоғи сертификат вазифасини бажариб ўз серия рақамига эга бўлади. Олтин қуймаларнинг сотиш нархлари ҳар куни Марказий банкнинг расмий веб-сайтида миллий валютада эълон қилиб борилади.
Қадоқлари бут олтин қуймалар сотув шохобчаларида қуйма эгасига тўловни амалга ошириш орқали қайтариб сотиб олинади.
Қадоғи бузилган ёки техник талабларга мос келмайдиган олтин қуймаларни қайтариб сотиб олиш уларни техник экпертизадан ўтказиш орқали амалга оширилади ва экспертиза ўтказилгандан сўнг тўлов тўлаб берилади.
Қадоғи бут ҳолатдаги олтин қуймаларни Ўзбекистон ҳудудидан ташқарига олиб чиқишга рухсат берилади.
Изоҳ (0)