Тошкент шаҳар ИИББ ходимлари бошқа ҳуқуқни муҳофаза қилувчи органлар билан ҳамкорликда гиёҳвандлик воситалари, психотроп моддалар ва уларнинг аналоглари билан қонунга хилоф равишда муомала қилиш фактларини аниқлаш ва уларга чек қўйиш борасида самарали ишларни давом эттирмоқда. Бу ҳақда пойтахт ИИББ ахборот хизмати хабар берди.
Маълум қилинишича, 12-13 февраль кунлари ўтказилган тезкор тадбирлар давомида Чилонзор туманида кучли таъсир қилувчи моддаларнинг муомаласи билан боғлиқ ҳолат аниқланган. Ўзини шубҳали тутган икки нафар шахслар ходимлар томонидан тўхтатилди.
Холислар иштирокида текширилган 29 ёшли Шоҳрух Мухаммедов ва 25 ёшли Абдулвосит Мухаммедовнинг ёнида, шунингдек Ш.Мухаммедовга тегишли Spark автомобиль салонида 53 дона “Зардекс” капсулалари аниқланиб, ашёвий далил сифатида расмийлаштириб олинган.
Суҳбат давомида гумонланувчилар ушбу моддаларни 29 ёшли Шоҳумардан ноқонуний равишда сотиб олганликларини маълум қилган. Тезкор тадбир давомида ходимлар кучли таъсир қилувчи дори воситаларини ноқонуний сотиш билан шуғулланган Шоҳумар Йўлдошевни қўлга олган.
Унинг яшаш манзили холислар иштирокида текширилганда, 1 939 дона “Зардекс” номли кучли таъсир қилувчи дори воситалари аниқланиб, ашёвий далил сифатида расмийлаштириб олинган.
Мазкур ҳолат юзасидан гумонланувчиларга нисбатан Жиноят кодексининг 273- (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш), 251-1-моддалари (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят иши қўзғатилган. Тергов давом этмоқда.
Изоҳ (0)