Тошкент шаҳри аҳолиси йилига 100 минг нафарга кўпаймоқда. Бу ҳақда шаҳар ҳокими Шавкат Умрзоқов “Дарё” мухбирига берган интервьюсида маълум қилди.
Шавкат Умрзоқов пойтахтга сони ўсиб бораётган аҳолини қандай сиғдириш мумкинлиги тўғрисидаги саволга жавоб қайтарди. Ҳокимнинг айтишича, “Янги Тошкент” лойиҳаси мазкур масалага ечимдир.
“Тошкент шаҳри аҳолиси йилига 100 мингтага ошяпти. Буни ички миграция ҳам ўз ичига олади. Президент бу йил пойтахтда 18 мингта хонадон қуришимизни айтдилар. Янги уйларда 100 минг одам яшайди. Албатта, келажакдаги ўсишни ҳисобга оляпмиз. Олдин бундай туғилиш, ‘пропка’лар бўлмаган. Шаҳар ҳам кенгаймоқда. Ўзида бир миллион кишини сиғдира оладиган янги шаҳар қурамиз. Бунга зарур бўлган барча инфрасутруктура яратилади. Шаҳарга ҳар йили 100 минг одам келса, 10 йилда уларнинг сони 1 миллион нафарга етади. Ҳаммасига сабр ва шукроналик билан эришамиз”, — деди ҳоким.
Маълумотларга кўра, бугунги кунда Тошкент ҳудуди 43 минг гектар, аҳоли сони 3 миллионга яқинлашган. Прогнозларга қараганда, 2041 йилга бориб пойтахт аҳолиси 5 миллион кишига етади.
2022 йил октябрда президент Шавкат Мирзиёев Тошкент шаҳрининг 2045 йилгача бўлган Бош режаси лойиҳаси билан танишганди. Лойиҳага кўра, келгуси 22 йил ичида “Янги Тошкент” барпо этилади. Яъни пойтахтнинг шарқий қисмида, Чирчиқ ва Қорасув дарёлари оралиғида янги шаҳар қурилади. У 20 минг гектар майдонни эгаллайди.
Мазкур лойиҳа устида “ТошкентбошпланЛИTИ” корхонаси чет эллик ва маҳаллий лойиҳачилар икки йил давомида ишлаган. Жараён жавомида аҳолининг ўсиши, транспорт ва муҳандислик тармоқлари, иқлим ўзгаришлари таҳлил қилиниб, шу асосида транспорт тугунлари ва аҳоли пунктларини ривожлантириш стратегияси ишлаб чиқилган.
Траспорт вазири Илҳом Маҳкамов “Дарё” мухбирига берган интервьюсида “Янги Тошкент”да трамвай линияси ҳам қурилишини айтди.
“Мутахассислар Тошкент шаҳри ичига трамвай киритилса, биз каттароқ тирбандликка дуч келишимизни айтмоқда. Трамвай юргандан кейин эмас, қурилиш жараёнида. Бу кўп вақт ва маблағ талаб қилади. Шунинг учун яқин орада президентимиз ҳузурида ‘Янги Тошкент’ билан ‘Эски Тошкент’ни боғлайдиган трамвай лойиҳаси тақдимотини ўтказамиз”, — деди вазир.
Изоҳ (0)