Ўзбекистоннинг турли ҳудудларида ёз фасли кириб келиши билан электр энергияси таъминотида тез-тез узилишлар содир бўлмоқда. Хусусан, июнь ойи давомида Тошкент шаҳрининг бир қатор ҳудудлари токдан узилди. Масъуллар буни таъмирлаш ишлари олиб борилаётгани билан изоҳласа, фуқаролар об-ҳаво ҳарорати энг пикка чиққан ёз ойларида электрнинг йўқлигидан норози.
“Дарё” мухбири шу муносабат билан “Ҳудудий электр тармоқлари” АЖ Тошкент шаҳар филиали бош муҳандиси ўринбосари Нодир Исроилов билан интервью ташкил қилиб, таъминотдаги узилишлар сабаблари ҳақида сўради.
Ҳозирда подстанциялар таъмирланяпти
“Ҳозирги кунда Тошкент шаҳри аҳолисини узлуксиз, сифатли электр энергияси билан таъминлаш мақсадида 91-сонли дастурга асосан 903-километр тармоқ, 228 та трансформатор подстанциясини янгилаш, Миробод, МИрзо Улуғбек, Олмазор, Юнусобод туманларида 4 та 110 киловолтли подстанцияни реконструкция қилиш ҳамда 5 та 110 киловолтли юқори кучланишли подстанцияни ишга тушириш режалаштирилган.
Албатта, бу ишларни олиб боришда техника хавфсизлиги жиҳатдан подстанциялардан қисқа муддатли ўчиришлар содир бўляпти. Ҳозирда ушбу реконструкция, модернизация ишлари доирасида электр энергиясида юзага келайтоган узилишлар қисқа муддатда содир бўлади. Трансформатор ўрнатилиши, янги тармоқ қурилиши сабабли эски хизмат муддатини ўтаб бўлган линияни ўчириш, янги ишга туширилаётган тармоқларни кабелли линияси, ҳаво узатиш электр тармоғи, трансформатор подстанцияларини янгилаш даврида қисқа муддатли ўчишлар юз беради”.
Хавфсизлик учун тармоқни ўчиришга мажбурмиз
“Бажариладиган ишлар амалга ошгандан сўнг истеъмолчиларимиз томонидан келаётган эътирозлар кескин камаяди. Сабаби — қувват ошади, тармоқ янгиланади, электр узатиш сифати ошади. Таъмирлаш ишлари жараёнида эса, албатта, ўчиш содир бўлади. Кучланиш остида бўлган ҳар бир тармоқни ўчиришга мажбурмиз. Чунки капитал таъмирлаш давомида ишчилар, техник ходимлар хавфсизлиги нутқаи назаридан ушбу тадбирни амалга оширишимиз керак”.
Электрдаги узилишларга авария сабаб бўлмади
“Ҳурматли фуқаролар, Тошкент шаҳрида электр энергияни узатишдаги узилишларга асосий сабаб авариявий ҳолатлар эмас, реконструкция ишлари ҳисобланади. Келгусида бу ишлар амалга ошиб, янги тармоқлар ишга тушгач, ўчишлар сони кескин камаяди.
Зеро “қиш ғамини ёзда кўр” иборасига амал қилган ҳолда, айни кунларда олиб борилаётган ушбу саъй-ҳаракатларимиз ҳам нафақат ёзнинг жазирамаси, балки қишнинг совуқ кунларида электр таъминоти билан боғлиқ авариялар сонини камайтириш, тармоқлар ҳамда трансформаторларда вужудга келиши мумкин бўлган юкламаларни камайтириш мақсадида олиб борилмоқда.
Ҳозирги пайтда ушбу дастур доирасида ишларни тезкорлик билан бажариш, авариявий ҳолатларини зудлик билан бартараф этиш учун Тошкент шаҳар электр тармоқлари ва унинг 12 та ҳудудий филилалида кун-у тун иш режаси ташкил қилинган. Қисқа муддатларда ишлар охирига етказилиб, электр энергия таъминоти мунтазам равишда ишга тушади. Яқин кунларда нормал режимга қайтиб, стабил тарзда электр етказиб берамиз”.
Маълумотлар шериклик ҳуқуқи асосидан тайёрланди
Изоҳ (0)