Ўзбекистон ва Кувайт ўртасида тўғридан-тўғри ҳаво қатновлари йўлга қўйилиши мумкин, деб хабар бермоқда “Дунё” ахборот агентлиги.
Бу масала Ўзбекистон элчиси Аюбхон Юнусов ва Кувайт Фуқаро авиацияси бош бошқармаси раҳбари шайх Ҳамуд Муборак ал-Ҳамуд ал-Жобир ас-Сабоҳ билан учрашув давомида муҳокама қилинган.
Суҳбат чоғида Ўзбекистон ва Кувайт авиация ташкилотлари ўртасидаги ҳамкорликни жадаллаштириш, тўғридан-тўғри ҳаво қатновларини йўлга қўйиш ва бошқа масалалар кўриб чиқилган.
Шайх Ҳамуд Муборак ал-Ҳамуд 2024 йил 24 октябрь куни Малайзияда бўлиб ўтган ИКАО йиғилиши доирасида Ўзбекистон Фуқаро авиацияси делегацияси билан бўлган самарали учрашуви натижаларини эътироф этди. Унинг айтишича, Kuwait Airlines авиакомпаниясининг самолётлар паркини кенгайтириш мақсадида 2025 йилда ал-Кувайт—Тошкент йўналиши бўйича авиарейсларни амалга оширишни режалаштирмоқда.
Ўз навбатида, сўнгги йилларда виза режими соддалаштирилиши натижасида 90 дан ортиқ хорижий давлатлар, жумладан, Кувайт фуқаролари учун Ўзбекистонга визасиз кириш тартиби амал қилаётгани ҳам Kuwait Airlines авиакомпанияси йўловчилари сонининг ортишига турки бўлиши қайд этилди.
Музокаралар натижасида, Кувайт Фуқаро авиацияси бош бошқармаси ва Ўзбекистоннинг тегишли идоралари ўртасида музокаралар ўтказиш тўғрисида келишиб олинди.
2024 йилнинг октябрида Кувайт фуқароларини Ўзбекистон шаҳарларига тўғридан тўғри учиб келишига кенг имконият яратиш ҳамда зиёрат туризмига янада кенг йўл очиш мақсадида икки мамлакат ўртасидаги ҳафталик авиақатновларни ҳар бир томондан 14 тага етказиш орқали 28 тага олиб чиқиш бўйича келишув имзоланганди.
Айни вақтга қадар Ўзбекистон ва Кувайт ўртасида амалга ошириб келинаётган авиақатновлар 1994 йилда имзоланган битим асосида бажарилиб, ҳар бири томондан фақатгина биттадан авиакомпанияга парвозларни амалга ошириш ҳуқуқи берилган эди.
Изоҳ (0)