Туркманистоннинг собиқ президенти Гурбангули Бердимуҳамедов катта қизи Ўғилжаҳон Атабоевани васийликдаги болаларга ёрдам бериш Хайрия жамғармасининг даволаш фаолияти бўйича вице-президенти лавозимига тайинлади. Бу ҳақда Тurkmennews хабар берди.
Тайинлов 7 декабрь куни Арқадағ шаҳрида бўлиб ўтган Хайрия жамғармасининг бошқаруви йиғилишида эълон қилинган. Ўғилжаҳон Атабоева яқин вақтгача Туркманистоннинг Лондондаги элчихонасида маслаҳатчи бўлиб ишлаган Давлат Атабоевнинг рафиқаси. Эр-хотин Арқадағ шаҳри қурилиши бошлангач Туркманистонга қайтиб келган.
Давлат Атабоев расмий равишда Арқадағ қурилиши бўйича давлат қўмитаси раҳбари Даря Ўразовнинг маслаҳатчиси ҳисобланади. Бироқ у ерда тиббиёт кластери объектларига яширинча бошчилик қилади, дейилади хабарда.
Гурбангули Бердимуҳамедов ва унинг рафиқаси Ўғилгерек Бердимуҳамедованинг уч фарзанди бор: давлат раҳбари лавозимида отасининг ўрнини эгаллаган ўғли Сердар ҳамда икки қизи — Ўғулжаҳон ва Гулшан.
Изоҳ (0)