Шавкат Мирзиёев 8 ноябрь куни “Европа тикланиш ва тараққиёт банки иштирокида Хоразм вилоятидаги умумий фойдаланишдаги автомобиль йўлларини реконструкция қилиш ва ривожлантириш чора-тадбирлари тўғрисида”ги қарорни имзолади.
Қарорга кўра, 2024—2029 йилларда умумий қиймати 294,1 млн АҚШ доллари бўлган Д 213 “Урганч — Хонқа — Ҳазорасп — Амударё дарёси — А380” автомобиль йўлининг 0 — 84 км қисмини реконструкция қилиш назарда тутилган.
Лойиҳада ЕТТБнинг улуши 238,0 млн АҚШ долларини, Ўзбекистоннинг улуши 56,1 млн долларни ташкил этади. Ажратилган қарзларни қайтариш, фоиз ва бошқа тўловлар бўйича харажатлар 4 йиллик имтиёзли даврни ўз ичига олувчи 18 йил муддат давомида республика бюджети маблағлари ҳисобидан амалга оширилади.
Автомобиль йўллари қўмитаси ва унинг таркибидаги “Автойўлинвест” агентлиги лойиҳани ўз вақтида сифатли амалга ошириш ҳамда ЕТТБ қарзидан мақсадли ва самарали фойдаланиш бўйича масъул ижро этувчи орган ҳисобланди.
Қарор билан лойиҳа доирасида мақбуллаштириладиган ва иқтисод қилинадиган маблағлар ҳисобига Хоразм вилоятидаги Д 217 “Урганч — Гурлан — Манғит — Туркманистон Республикаси чегараси” автомобиль йўлининг 5 — 75 км қисмини қайта қуриш лойиҳасига йўналтирилиши кўзда тутилган.
Шунингдек, реконструкция қилинадиган автомобиль йўлларининг йўл бўйи минтақаларида иқлим шароитларини ҳисобга олган ҳолда 30 минг дона манзарали дарахт ва буталар экилиши белгиланган.
Қайд этиш лозим, бу стратегик муҳим йўл Урганчни Қозоғистонга А380 йўли билан боғловчи транспорт тармоғининг бир қисми ва Марказий Осиё минтақавий иқтисодий ҳамкорлигининг 2-йўлаги ҳисобланади.
Қурилиш ишлари тугаллангач, ҳозирги бир қаторли 2-тоифали йўл икки қаторли 1-тоифали автомобиль йўлига айланади.
Аввалроқ май ойида ЕТТБ Хоразм вилоятидаги йўлни модернизация қилиш учун 238 млн доллар кредит ажратгани маълум қилинганди.
Изоҳ (0)