Turkmanistonning sobiq prezidenti Gurbanguli Berdimuhamedov katta qizi O‘g‘iljahon Ataboyevani vasiylikdagi bolalarga yordam berish Xayriya jamg‘armasining davolash faoliyati bo‘yicha vitse-prezidenti lavozimiga tayinladi. Bu haqda Turkmen.news xabar berdi.
Tayinlov 7-dekabr kuni Arqadag‘ shahrida bo‘lib o‘tgan Xayriya jamg‘armasining boshqaruvi yig‘ilishida e’lon qilingan. O‘g‘iljahon Ataboyeva yaqin vaqtgacha Turkmanistonning Londondagi elchixonasida maslahatchi bo‘lib ishlagan Davlat Ataboyevning rafiqasi. Er-xotin Arqadag‘ shahri qurilishi boshlangach Turkmanistonga qaytib kelgan.
Davlat Ataboyev rasmiy ravishda Arqadag‘ qurilishi bo‘yicha davlat qo‘mitasi rahbari Darya O‘razovning maslahatchisi hisoblanadi. Biroq u yerda tibbiyot klasteri obyektlariga yashirincha boshchilik qiladi, deyiladi xabarda.
Gurbanguli Berdimuhamedov va uning rafiqasi O‘g‘ilgerek Berdimuhamedovaning uch farzandi bor: davlat rahbari lavozimida otasining o‘rnini egallagan o‘g‘li Serdar hamda ikki qizi — O‘g‘uljahon va Gulshan.
Izoh (0)