Футбол бўйича Ўзбекистон терма жамоаси Бирлашган Араб Амирликлари пойтахти Абу-Даби шаҳрида ўқув-йиғин машғулотларини ўтказмоқда.
Сречко Катанец ушбу йиғинга 24 нафар футболчини жалб қилди:
Дарвозабонлар: Абдувоҳид Неъматов (“Насаф”), Ботирали Эргашев, Валижон Раҳимов (иккаласи ҳам “ОКМК”), Ўткир Юсупов (“Навбаҳор”);
Ҳимоячилар: Рустам Ашурматов (“Рубин”), Фарруҳ Сайфиев, Ҳожиакбар Алижонов, Муҳаммадқодир Ҳамралиев (барчаси “Пахтакор”), Абдурауф Бўриев (“Олимпик”), Умарбек Эшмуродов, Ғолиб Ғайбуллаев, Шерзод Насруллаэв, Зафармурод Абдираҳматов (“Насаф”);
Ярим ҳимоячилар: Одил Ҳамробеков, Диёр Холматов, Азизбек Турғунбоев, Ҳожимат Эркинов (барчаси “Пахтакор”), Жамшид Искандеров, Жамшид Болтабоев, Остон Ўрунов (барчаси “Навбаҳор”), Азизбек Амонов (“Насаф”), Шаҳбоз Умаров (“Ордабаси”), Аббосбек Файзуллаев (“ЦСКА”);
Ҳужумчи: Бобир Абдихолиқов (“Ордабаси”).
Йиғинда иштирок этадиган бир қатор легионер футболчилар ўз клублари таркибидаги ўйинлари сабабли терма жамоа йиғинига кейинроқ қўшилди. 14 декабрь куни Рустам Ашурматов ҳамда Абдурауф Бўриев Ўзбекистон терма жамоаси таркибига бориб қўшилди. Орадан бир кун ўтиб, Ҳожиакбар Алижонов ҳам йиғинга етиб борди.
Шунингдек, Остон Ўрунов ҳам кечроқ терма жамоа таркибига қўшилди. Хабарларга кўра, Алижонов ва Ўрунов кичик жароҳат сабабли йиғинга вақтида етиб бора олмаган. 17 декабрь куни эса “ЦСКА” шарафини ҳимоя қилаётган Аббосбек Файзуллаев терма жамоа сафидан ўрин олди.
Лекин таркибга эътибор қаратадиган бўлсак, Ўзбекистон терма жамоаси тўпурари Элдор Шомуродовнинг йўқлигини кўриш мумкин. Шомуродов бир неча кун олдин “Кальяри” сафида машғулотлар ўтаётган вақтда жароҳат олган.
Италия клуби Шомуродовнинг аҳволи ҳақида расмий баёнот берди:
Хабарда текширувлардан сўнг Элдорнинг ўнг оёғи товон суяги сингани, жароҳатнинг қанчалик жиддийлиги борасида батафсил маълумот берилиши айтиб ўтилган.
Терма жамоанинг муҳим фигураси бўлган Шомуродов қачон сафга қайтиши, Осиё Кубогида иштирок этиш ёки эта олмаслиги борасидаги саволларга жавоб олиш учун “Дарё” ЎФА билан боғланди.
“Шомуродов “Кальяри”нинг машғулотларида жароҳат олган. Унинг қачон сафга қайтиши борасида клуб баёнот беради. Ҳозирча унинг қачон сафга қайтиши борасида аниқ маълумот йўқ”, — деб жавоб берди федерация матбуот хизмати.
Осиё Кубоги турнири бошланишига бир ойдан кам вақт қолди. Ўзбекистон терма жамоаси B гуруҳидан жой олди ва Австралия, Ҳиндистон ва Сурияга қарши баҳс олиб боради.
Сречко Катанец шогирдлари мусобақадаги илк ўйинини 13 январь куни Сурияга қарши ўйин билан бошлайди. Учрашув Тошкент вақти билан 22:30 да старт олади.
Изоҳ (0)