Суперлига. “Бунёдкор” 5 та гол урилган ўйинда “Пахтакор”дан устун келди, “Насаф” “ОКМК” билан, “Навбаҳор” эса водий дербисида “Нефтчи” билан дуранг ўйнади

Футбол бўйича Ўзбекистон Суперлигасининг 26-туридан ўрин олган ўйинлар 1 декабрь, жума куни бўлиб ўтди.

“Пахтакор” “Бунёдкор”га қарши баҳс олиб борди. Учрашувнинг 14-дақиқасида Пўлатхўжа Холдорхонов гол урди. 34-дақиқада Шоҳруҳ Абдураҳмонов ҳисобни тенглаштирди. Орадан 3 дақиқа ўтиб, “Бунёдкор” футболчиси Велингтон Таира жамоасини ҳисобда олдинга олиб чиқди. Иккинчи бўлим бошида Драган Черан мувозанатни тиклади. 59-дақиқада Маҳмуджон Маҳамаджонов “Бунёдкор”нинг учинчи голига муаллифлик қилди. Қолган дақиқаларда дарвозалар ишғол этилмади ва “Бунёдкор” ғалабани расмийлаштирди.

“ОКМК” ўзида “Насаф”ни қабул қилди. Учрашувда 1:1 ҳисобида дуранг қайд этилди. Олмалиқ клуби таркибида Муҳаммаданас Ҳасанов гол урди, “Насаф” сафида Акмал Мозговой дарвозани ишғол қилди. Қайд этиб ўтиш жоиз, 83-дақиқада “ОКМК” футболчилари Санжар Турсунов ва Ислом Тўхтахўжаев қизил карточка билан жазоланди. 

“Навбаҳор” эса водий дербисида “Нефтчи”га қарши майдонга тушди. Учрашувнинг 39-дақиқасида Мирзоҳид Ғофуров ҳисобни очди. 68-дақиқада Милош Милович мувозанатни тиклади. Ўйин охирига қадар шу ҳисоб сақланиб қолди ва жамоалар 1 очкодан қўлга киритди.

Суперлига

26-тур

1 декабрь, жума

“Пахтакор” – “Бунёдкор” 2:3

Голлар: 1:0 — 14 Пўлатхўжа Холдорхонов, 1:1 — 34 Шоҳруҳ Абдураҳмонов, 1:2 — 37 Велингтон Таира, 2:2 — 47 Драган Черан, 2:3 — 59 Маҳмуджон Маҳамаджонов.

“ОКМК” – “Насаф” 1:1

Голлар: 0:1 — 53 Акмал Мозговой, 1:1 — 60 Муҳаммаданас Ҳасанов.

“Навбаҳор” – “Нефтчи” 1:1

Голлар: 0:1 — 39 Мирзоҳид Ғофуров, 1:1 — 68 Милош Милович.