Тошкент метросининг яна 9 та метро бекатида она ва бола хонаси ҳамда ҳожатхона ташкил қилинади. Бу ҳақда метрополитен матбуот хизмати хабар берди.
2022 йилнинг февралида Тошкент метрополитенининг “Чилонзор” бекатида она ва бола хонаси ҳамда ҳожатхона фойдаланишга топширилганди. Ўшанда ҳожатхона синов тариқасида қурилган, келгусида гавжум, йўловчилар оқими кўп бўлган “Пахтакор”, “Буюк ипак йўли” ва бошқа бекатларда қурилиши режалаштирилгани билдирилганди.
Метрополитен матбуот хизмати хабарида таъкидланишича, “Чилонзор” бекатидаги она ва бола хонаси ҳамда ҳожатхона синов жараёнлари ўзини оқлади. Бошқа бекатларга нисбатан йўловчилар билан гавжум бўлган яна 9 та метро бекатида она ва бола хонаси ҳамда ҳожатхона қурилиши учун зарур ишлар амалга оширилиши бошланмоқда.
Хабарда ҳожатхоналар айнан қайси бекатлардава қачон қурилишига аниқлик киритилмаган.
Бундан бир неча кун аввал номаълум эркак метрополитен бекатида ҳожатини чиқариб кетгани акс этган видео ижтимоий тармоқларда тарқалиб, кенг муҳокамаларга сабаб бўлганди. “Тошкент метрополитени” бунга муносабат билдириб, ҳолат 2024 йилнинг 27 сентябрида содир этилганини, фуқаронинг шахсига аниқлик киритилганини, унга нисбатан терговга қадар суриштирув ишлари амалга оширилаётганини маълум қилганди.
Изоҳ (0)