Швеция ҳукумати Туркия ҳукумати террорчилик ташкилоти деб ҳисоблайдиган Курдистон ишчилар партиясига аъзолиги учун судланган биринчи маҳкумни Туркияга топширди, деб хабар беради Anadolu агентлиги. Шу тариқа, Швеция НАТОга қўшилишига Туркия рози бўлганидан кейин ўз зиммасига олган мажбуриятларни бажаришга киришди.
Гап Маҳмуд Татнинг экстрадиция қилиниши ҳақида бормоқда. У террорчилик фаолияти учун Туркияда олти йил-у ўн ойга ҳукмк қилинган эди. Туркия ҳукумати маълумотларига кўра, у Тунжели шаҳрида Курдистон ишчилар партияси фаолиятида қатнашган. 2015 йилда мамлакатдан қочиб кетиб, Швециядан бошпана сўраган, бироқ унга рад жавоби берилган. 2 декабрь куни кечқурун Тат Истанбулга келтирилган, шундан кейин тергов изоляторига жойлаштирилган.
Маҳмуд Тат 22 ноябрь куни қўлга олинган. Ўша куни унга қариндошлари билан боғланиш учун рухсат берилмаган. Кейинроқ у Швецияда яшайдиган ўғли Озанга қўнғироқ қилиб, Туркияга экстрадиция қилинганини ва Истанбул аэропорти қошидаги полиция бўлинмасида турганини айтган.
Татнинг Швеция ҳукумати томонидан тайинланган адвокати Абдулла Девержи экстрадиция ҳақидаги ишнинг қайта кўриб чиқилишида ёрдам сўраб, кўплаб швециялик ҳуқуқшуносларга мурожаат қилганини, бироқ улар бунга криишишдан бош тортганини айтди.
Финляндия ва Швеция НАТОга қўшилиш учун қачон ариза берган?
18 май куни Финляндия ва Швеция Украинадаги жанговар ҳаракатлар авж олган бир пайтда НАТОга қўшилиш учун ариза берган. Туркия Хелсинки ва Стокгольмни мамлакатда тақиқланган Курдистон Ишчилар партияси билан ҳамкорликда айблаб, уларнинг альянсга қўшилишга бир муддат тўсқинлик қилди.Швеция ва Финляндия НАТО блокига қўшилиши учун альянсга аъзо бўлган 30 та мамлакатнинг барчаси тегишли битимни ратификация қилиши керак.
Швеция ва Финляндиянинг НАТОга аъзо бўлишини ратификация қилиш жараёни 5 июль куни бошланган. Уларнинг НАТОга қўшилишини альянснинг 30 та аъзосидан 28 таси ратификация қилди.
Туркия нега қаршилик қилмоқда?
Швеция узоқ вақтлар мобайнида нафақат Анқара, балки Вашингтон ва Брюссель томонидан террорчилик ташкилотлари деб тан олинган ҳаракатлар аъзоларига бошпана бериб келган. Россия Украинага бостириб киргач, вазият ўзгарди. Швеция НАТОга қўшилиш учун ариза берди, аммо Туркия бу жараёнга тўсқинлик қила бошлади.Туркиянинг асосий шартлари, хусусан, Курдистон ишчилар партияси аъзоларини ва 2016 йилги давлат тўнтаришига уринишда гумон қилинганларни Анқарага экстрадиция қилиш. Аввалроқ Туркия адлия вазири Бекир Боздаг Хелсинки ва Стокгольмни террорчиларни экстрадиция қилишдан бош тортишда айблаган эди. Унинг айтишича, Финляндия ва Швеция Туркия томони юборган экстрадиция рўйхатидан бирорта террорчини ҳалигача Анқарага топширгани йўқ.
Ноябрь ўрталарида Швеция парламенти мамлакат конституциясига аксилтеррорчилик қонунчилигини кучайтирувчи ўзгартиришлар киритилишини маъқуллади. Швеция асосий қонунига Туркия сабабли тузатишлар киритилди, у мамлакатнинг НАТОга аъзо бўлишига ҳалигача тўсқинлик қилиб келаётган эди. Энди Швецияда Анқара террорчилик ташкилотлари деб ҳисоблайдиган курд ҳаракатлари (биринчи навбатда Курдистон ишчилар партияси) билан боғлиқ шахсларга нисбатан иш очиш осонроқ бўлади. Маъқулланган ўзгаришлар 2023 йил 1 январда кучга кириши керак.
Изоҳ (0)