ШҲТ саммити муносабати билан Самарқанд шаҳридаги мактабларда дарслар 19 сентябрдан бошланади. Бу ҳақда вилоят Халқ таълими бошқармаси матбуот хизмати хабар берди.
«Хабарингиз бор, жорий йил сентябрь ойида мамлакатимизда Шанхай ҳамкорлик ташкилоти давлат раҳбарларининг олий даражадаги навбатдаги саммити, шунингдек қатор хорижий мамлакат раҳбарларининг расмий ташрифлари бўлиб ўтади.
Мазкур жараёнлар ва тадбирлар ўтказиладиган ҳудудларга яқин жойларда жамоат тартибини сақлаш ва хавфсизликни таъминлаш, шунингдек, аҳолига қулай шароитларни яратиш мақсадида Самарқанд шаҳридаги умумий ўрта таълим муассасаларида ўқув жараёнлари жорий йилнинг 19 сентябрь санасидан бошланишини маълум қиламиз», — дейилади ХТБ хабарида.
Қайд этилишича, Самарқанд шаҳридаги мактаб ўқувчиларининг қолдирилган дарс соатлари ўқув йили давомида таътиллар ҳисобидан тўлдирилади.
Маълумот учун, Самарқанд ШҲТнинг навбатдаги саммитига 15—16 сентябрь кунлари мезбонлик қилади. Самарқанд саммити Эрон 2021 йил сентябрида ташкилотга тўлақонли иштирокчи сифатида қўшилганидан бери биринчиси бўлади. ШҲТга аъзо давлатлар: Ўзбекистон, Хитой, Россия, Қозоғистон, Қирғизистон, Тожикистон, Покистон, Ҳиндистон ва Эрон. Афғонистон, Мўғулистон ва Беларусь ташкилотда кузатувчи, Туркия эса мулоқот бўйича ҳамкор сифатида иштирок этади.
Саммитда ташкилотга аъзо кўплаб давлатлар билан умумий чегарага эга Афғонистондаги вазият ҳар томонлама муҳокама қилинади ва муҳим қарорлар қабул қилиниши кутилмоқда.
Мавзуга доир:
Изоҳ (0)