Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси инспекторлари томонидан Янгийўл туманида навбатдаги экологик назорат тадбирлари ўтказилди. Бу ҳақда Экология вазирлиги матбуот хизмати хабар берди.
Маълум қилинишича, рейд давомида туманнинг “Халқабод” МФЙ, Ўзбекистон кўчасида 1 туп кўп йиллик чинор дарахти таг қисмидан кесилгани ҳамда яна 1 туп кўп йиллик чинор дарахтига қасддан шикаст етказилгани аниқланди.
Ҳолат юзасидан тезкор суриштирув ўтказилиб, ҳуқуқбузарлик Тошкент шаҳри Чилонзор тумани, Гавҳар кўчасида яшовчи фуқаро Х.Д. томонидан содир этилгани маълум бўлди. У табиатга 199 миллион сўмдан ортиқ зарар етказган.
Ҳозирда тегишли ҳужжатлар расмийлаштирилиб, ҳолатга ҳуқуқий баҳо бериш ва чора кўриш мақсадида Тошкент вилояти прокуратурасига юборилган.
Бундан аввал Хоразмда 4 туп павловния дарахтини кесган шахс 27 млн сўмдан ортиқ жаримага тортилганди. Шунингдек, Сурхондарёда автомобиль йўлларини реконструкция қилишда қарийб 9,5 минг туп дарахт кўчирилиши мумкинлиги айтилганди.
Изоҳ (0)