Еврокомиссия (ЕК) президенти Урсула фон дер Ляйен ва Европа парламентидаги Европа халқ партияси фракцияси раҳбари Манфред Вебер Венгриянинг қонуний ҳукуматини ағдариб, унинг ўрнига “қўғирчоқ ҳукумат”ни ўрнатиш ниятида.
Бундай фикрни Венгрия бош вазири Виктор Орбан Косут радиостанцияси эфирида билдирган.
“Европа комиссияси президенти Урсула фон дер Ляйен ва Европа халқ партияси раҳбари Манфред Вебер суверен Венгрия ҳукуматини ағдариб, унинг ўрнига Брюссел услубидаги маъмуриятни қуришга интилмоқда”, деди Орбан.
Бош вазирнинг сўзларига кўра, Европа комиссияси раиси унинг ўрнига мухолифатдаги “Демократик коалиция” партияси аъзоси Клара Добревни қўймоқчи, Европа халқ партияси раҳбари эса “Тисза” мухолифат партияси етакчиси Питер Мадярни Венгрия ҳукумати тепасида кўришни истамоқда.
Орбаннинг фикрича, бу сиёсатчиларнинг ҳар иккаласи ҳам Украинадаги урушга аралашиш бўйича “Брюссел талабларини бажаришга тайёр”. Шунингдек, улар ноқонуний мигрантларнинг чекловсиз киришини маъқуллаш орқали Европа Иттифоқининг миграция сиёсатини қўллаб-қувватлашга ҳамда “иқтисодий ва савдо урушларида қатнашиш”га розилар.
Изоҳ (0)