Боing иш ташлашни олдини олиш учун 33 минг ишчининг маошини рекорд даражада оширади

American Boing компанияси аввалроқ машинистлар ва аэрокосмик ишчилар халқаро ассоциациясининг иккита маҳаллий бўлими билан компаниянинг 33 мингдан ортиқ ходимлари манфаатларини ифодаловчи янги шартнома шартларини келишиб олди, дейилади компания баёнотида.

Тўрт йиллик шартнома тасдиқланса, Вашингтон, Орегон (Портленд) ва Калифорния штатларида ишчилар учун базавий иш ҳақи компания тарихидаги энг юқори даражада — 25 фоизга ошади.

Бундан ташқари, уларнинг ҳар бирига 3 минг доллардан бир марталик тўлов тўланади.

Гап биринчи навбатда 737 МАХ, 767, 777/777Х, P-8, КS-46А Таnker ва E-7 Wеdgetail самолётларини ишлаб чиқаришда иштирок этган ходимлар ҳақида кетмоқда.

Шартнома Вашингтон штатида янги Boing самолётларини ишлаб чиқаришни ҳам ўз ичига олади. Бу ассоциациянинг асосий талабларидан бири эди, деб ёзади Associated Press.

Аввалроқ Касаба уюшмаси агар муросага эришилмаса, иш ташлаш билан таҳдид қилганди. Шартномани ратификация қилиш бўйича овоз бериш 12 сентябрь, пайшанба куни бўлиб ўтади.

Мутахассислар ходимларнинг иш ташлаши Boing’га тахминан 3 миллиард доллар зарар келтириши мумкинлигини айтишмоқда.