Promouter Bob Arum yaponiyalik bokschi Naoya Inouening keyingi ikkita jangi kimlarga qarshi bo‘lishini ma’lum qildi. Uning rejalarida o‘zbekistonlik bokschi Murodjon Ahmadaliyev yo‘q.
Naoya keyingi jangini IBF yo‘nalishida rasmiy da’vogar 25 yoshli avstraliyalik Sem Gudmenga (19-0, 8 КО) qarshi o‘tkazadi. Jang 24-dekabr kuni Tokioda bo‘lib o‘tishi ko‘zda tutilgan.
2025-yilning ikkinchi yarmida Inoue WBC chempioni Junto Nakataniga (28-0, 21 KO) qarshi ringga ko‘tariladi. Jang AQSHda bo‘lib o‘tadi.
26 yoshli Nakatani ayni vaqtda The Ring talqiniga ko‘ra, P4P reytingida 9-o‘rinda bormoqda. U Inoue bilan jang qilish uchun vaznini ko‘tarishga tayyorligini bildirgan.
Naoya kecha, 3-sentyabr kuni mutlaq jahon chempionligi unvonini himoya qilgandi. Tokioda bo‘lib o‘tgan boks oqshomida yaponiyalik sportchi Ti Jey Doeniga qarshi jang qilib, yettinchi raundda uni nokautga uchratgan. Inouening zarbasidan so‘ng Doeni jangni davom ettirolmasligi ma’lum bo‘lgandi.
