Ўзгидромет 27-29 октябрь кунлари мамлакат бўйлаб ҳаво ҳарорати қандай бўлишини маълум қилди. Унга кўра, кўплаб ҳудудларда кечаси -2 даража совуқ бўлади.

Жумладан, Қорақалпоғистон Республикаси ва Хоразм вилоятида ҳарорат 27 октябрда кечаси 2-7 даража, кундузи 12-17 даража бўлади. 28 октябрда кечаси эса 0-5 даража илиқ, баъзи жойларда -2 даража совуққача, кундузи 5-10 даража илиқ бўлади. 

29 октябрь, чоршанба куни кечаси -3 даража совуқ, +2 даража илиқ, кундузи 5-10 даража, Устюртда кечаси -2–7 даража совуқ, кундузи 2-7 даража илиқ бўлади. 

Тошкент, Сирдарё, Самарқанд ва Жиззах вилоятларида эса ҳарорат 27-28 октябрда кечаси 5-10 даража илиқ, 29 октябрда 0-5 даража илиқ, баъзи жойларда -2 даража совуқ бўлади. 

Жамоатчилик фаоллари муносабати

Иқлимшунос Эркин Абдулаҳатов Тошкент шаҳрида иссиқлик таъминотига қачон старт берилишини сўрамоқда. 

Мутахассиснинг ёзишича, кутилаётган ҳарорат камида 3 кун орқама-кетин ўртача суткалик ҳаво ҳарорати +8 даражадан паст бўлишини англатади.

Антициклон чеккасининг бизнинг минтақада 2,5 ёки 3,5 суткагача давом этиши инобатга олинса, совуқлик тўлқини ойнинг сўнгги кунларигача минтақамизни совитиши ойдинлашади. Антициклон совуғи очиқ ҳавода бу кишиларнинг суяк-суягигача совитиш омилини бериб, табиийки бу совуқ заҳри кўп қаватли бетон уйларни ҳам сезиларли “музлаши”га олиб келади, деб ёзади Эркин Абдулаҳатов.

Иқлимшунос нега бу жараён ортга сурилаётгани ҳақида савол қўймоқда. 

Кўп қаватли уйларда ҳозир ҳам жуда қалин кийим, қалин пайпоқ билан юришли ҳарорат режими кузатиляпти. Канал ботига пойтахтда кўп қаватли уйларда истиқомат қилувчи аксар аёллардан хабарлар келиб тушяпти. Улар бу совуқроқ уй ҳароратида болалари шамоллаб қолаётганини айтишмоқда. 

Маълумот учун, Тошкентда 2021 йил 14 октябрдан, 2022 йил 24 октябрдан ва 2023 йил 6 ноябрдан иссиқлик таъминоти узатилиш мавсуми бошланган, дея қўшимча қилган у.

Иқтисодчи Отабек Бакиров “Газ таъминотига чекловлар киритиладими?”, дея савол қўйган.

У Эркин Абдулаҳатовнинг сўровини келтирар экан, савол бундан-да кенгроқ қўйилиши кераклигини айтди. 

Қишки мавсум учун ваъда қилинган энергетика тизимига оид сценарийлар қачон эълон қилинади? Газ заправкаларидан иссиқхоналаргача бўлган тижорий субъектлардан тортиб, оддий истеъмолчиларгача қачон ва қайси ҳолатларда чекловлар бошланишини билишга ҳақли.

Биз худди аввалги йиллардаги каби қишга ташвишли ҳадик ва номаълумлик билан кириб бормоқдамиз, деб ёзади иқтисодчи.

Аввалроқ, Ўзбекистонда дам олиш кунлари ҳаво яна салқинлашиши ҳақида хабар берилган эди.